ឧត្តមសេនីយ៍ឯក សុខ វាសនា អនុញ្ញាតឲ្យ នុជ្ជនាថ អគ្គនាយកស្តីទី នៃការិយាល័យអន្តោប្រវេសន៍ អគ្គស្នងការនគរបាលថៃ ចូលជួបសម្តែងការគួរសម និងពិភាក្សាការងារ
ភ្នំពេញ៖ ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ នាព្រឹកថ្ងៃពុធ ១២រោច ខែភទ្របទ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១១ ខែតុលា ឆ្នាំ២០២៣ បានអនុញ្ញាតឲ្យលោកឧត្តមសេនីយ៍ត្រី ផាន់ថានៈ នុជ្ជនាថ អគ្គនាយកស្តីទី នៃការិយាល័យអន្តោប្រវេសន៍ អគ្គស្នងការនគរបាល ព្រះរាជាណាចក្រថៃ និងសហការី ចូលជួបសម្តែងការគួរសម និងពិភាក្សាការងារ។
ជាកិច្ចចាប់ផ្តើម ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ បានមានប្រសាសន៍ស្វាគមន៍ចំពោះគណៈប្រតិភូ ការិយាល័យអន្តោប្រវេសន៍ អគ្គស្នងការនគររបាល ព្រះរាជាណាចក្រថៃ និងបានជម្រាបថា អគ្គនាយកដ្ឋានអន្តោប្រវេសន៍បានត្រៀមខ្លួនរួចជាស្រេចក្នុងការបន្តពង្រឹង និងពង្រីកកិច្ចសហការ សម្របសម្រួលនីតិវិធីអន្តោប្រវេសន៍ ដើម្បីជាប្រយោជន៍រួមសម្រាប់ប្រជាជាតិទាំងពីរ។
លោកឧត្តមសេនីយ៍ត្រី ផាន់ថានៈ នុជ្ជនាថ បានធ្វើការថ្លែងអំណរគុណអគ្គនាយកដ្ឋានអន្តោប្រវេសន៍កម្ពុជា ដែលបានបន្តកិច្ចសហប្រតិបត្តិការដ៏ល្អនាពេលកន្លងមកដែលបានសម្របសម្រួលការងារសន្តិសុខ សណ្តាប់ធ្នាប់ និងឆ្លើយតបចំពោះសភាពការណ៍ជាទូទៅនៅតាមច្រកទ្វារព្រំដែនអន្តរជាតិ។ បន្ថែមពីលើនេះផងដែរ លោកឧត្តមសេនីយ៍ត្រី បានធ្វើការស្នើសុំឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ ចំពោះការសម្របសម្រួលកិច្ចសហការផ្លាស់ប្តូរព័ត៌មានអន្តោប្រវេសន៍ ក្នុងរូបភាពទប់ស្កាត់បទល្មើសផ្សេងៗ មានដូចជា ការជួញដូរមនុស្ស ការក្លែងបន្លំឯកសារធ្វើដំណើរ និងការធ្វើដំណើររបស់ជនសង្ស័យលើបទល្មើសផ្សេងៗចូលមកកាន់កម្ពុជា ឬក្នុងប្រទេសថៃ។ ជាពិសេសលោកឧត្តមសេនីយ៍ត្រី សង្ឃឹមថាកិច្ចជំនួបសម្តែងការគួរសមក្នុងពេលនេះនឹងបន្តរឹតចំណងកិច្ចសហប្រតិបត្តិការរវាងអង្គភាពទាំងពីរកាន់តែប្រសើរឡើងក្នុងនាមជាអ្នកជិតខាងល្អ។
ជាការឆ្លើយតប ឯកឧត្តម ឧត្តមសេនីយ៍ឯក អគ្គនាយកអន្តោប្រវេសន៍ បានឯកភាពចំពោះសំណើក្នុងការទទួល ក៏ដូចជាការផ្លាស់ប្តូរព័ត៌មានដើម្បីជាការធានាឱ្យបានក្នុងការរក្សាសន្តិសុខ និងសណ្តាប់ធ្នាប់របស់ប្រទេសកម្ពុជា ក៏ដូចជាសម្រាប់ប្រទេសក្នុងតំបន់។ ឯកឧត្តម ឧត្តមសេនីយ៍ឯក អគ្គនាយក បានធ្វើការស្នើសុំកិច្ចសម្របសម្រួលពីការិយាល័យអន្តោប្រវេសន៍ថៃចំពោះការសម្របសម្រួលជូនប្រជាជនកម្ពុជា ដែលស្នាក់នៅប្រទេសថៃ កំឡុងពេលដែលធ្វើដំណើរចូល និងចេញក្នុងឱកាសបុណ្យភ្ជុំបិណ្ឌប្រពៃណីជាតិខ្មែរនាពេលខាងមុខនេះ ដោយយោងតាមប្រសាសន៍ដឹកនាំដ៏ខ្ពង់ខ្ពស់ពីសម្តេចអធិបតីភាព ហ៊ុន ម៉ាណែត ដោយសម្តេចអធិបតី បានយកចិត្តទុកដាក់យ៉ាងខ្លាំងអំពីការធ្វើដំណើររបស់បងប្អូនប្រជាពលរដ្ឋកម្ពុជា ដែលកំពុងបម្រើការងារនៅប្រទេសថៃ អាចធ្វើដំណើរទៅមកដោយមានសុខសុវត្ថិភាព។ ជាការឆ្លើយតប លោកឧត្តមសេនីយ៍ត្រី ឯកភាពចំពោះសំណើនេះ និងសន្យាដាក់បញ្ជាទៅតាមច្រកទ្វារព្រំដែនអន្តរជាតិរបស់ខ្លួនជាមួយភាគីកម្ពុជា ឱ្យសម្របសម្រួលចំពោះការធ្វើដំណើររបស់ប្រជាពលរដ្ឋកម្ពុជា ក្នុងឱកាសបុណ្យភ្ជុំបិណ្ឌនាពេលខាងមុខនេះ។
ជាកិច្ចបញ្ចប់ ឯកឧត្តម ឧត្តមសេនីយ៍ឯក អគ្គនាយក បានធ្វើការថ្លែងអំណរគុណចំពោះការអញ្ជើញមករបស់គណប្រតិភូថៃក្នុងពេលនេះ និងសង្ឃឹមថាអង្គភាពទាំងពីរនឹងបន្តកិច្ចសហប្រតិបត្តិការឱ្យកាន់តែប្រសើរឡើង ៕
