ឯកឧត្តម ប៉ោ ភក្ដិ អញ្ជើញដឹកនាំកិច្ចប្រជុំគណៈកម្មការ រៀបចំចាត់ចែងការបណ្ដែតប្រទីប របស់ក្រសួងមហាផ្ទៃ

ភ្នំពេញ៖ ឯកឧត្តម នាយឧត្តមសេនីយ៍ ប៉ោ ភក្ដិ រដ្ឋលេខាធិការក្រសួងមហាផ្ទៃ និងជាប្រធានគណៈកម្មការរៀបចំចាត់ចែងការបណ្ដែតប្រទីប នាថ្ងៃទី១១ ខែតុលា ឆ្នាំ២០២៣ បានអញ្ជើញដឹកនាំកិច្ចប្រជុំគណៈកម្មការរៀបចំចាត់ចែងការបណ្ដែតប្រទីប របស់ក្រសួងមហាផ្ទៃ ដើម្បីចូលរួមអបអរសាទរព្រះរាជពិធីបុណ្យអ៊ុំទូក បណ្ដែតប្រទីប អកអំបុក និងសំពះព្រះខែ ដែលនឹងប្រព្រឹត្តទៅនៅថ្ងៃទី២៦ ២៧ និង២៨ ខែវិច្ឆិការ ឆ្នាំ២០២៣។

កិច្ចប្រជុំនេះ មានការអញ្ជើញចូលរួមពី ឯកឧត្តម ហោ សំអាត អគ្គនាយក នៃអគ្គនាយដ្ឋានបច្ចេកវិទ្យាឌីជីថល និងផ្សព្វផ្សាយអប់រំ, ថ្នាក់ដឹកនាំតំណាងអគ្គនាយកដ្ឋាន ភស្តុភារ និងហិរញ្ញវត្ថុ, ថ្នាក់ដឹកនាំតំណាងអគ្គលេខាធិការដ្ឋាន, ថ្នាក់ដឹកនាំតំណាងអគ្គស្នងការដ្ឋាននគរបាលជាតិ និងមន្ត្រីជំនាញពាក់ព័ន្ធដែលជាសមាជិកគណៈកម្មការរៀបចំចាត់ចែងការបណ្ដែតប្រទីប របស់ក្រសួងមហាផ្ទៃ ជាច្រើនរូបផងដែរ។

ជាកិច្ចចាប់ផ្ដើម ឯកឧត្តម នាយឧត្តមសេនីយ៍ ប៉ោ ភក្ដិ រដ្ឋលេខាធិការ បានមានប្រសាសន៍ថា កិច្ចប្រជុំនាពេលនេះ គឺប្រារព្ធឡើងដើម្បីជជែកពិភាក្សាគ្នា ធ្វើយ៉ាងណាតុបតែងឱ្យប្រទីបរបស់ក្រសួងមហាផ្ទៃ មានភាពទាក់ទាញ ស្អាត ដើម្បីបង្ហាញដល់ថ្នាក់ដឹកនាំ ជាពិសេសមហាជនទូទៅ និងស្របតាមការវិវត្តនៃសម័យឌីជីថល។

បន្ទាប់ពីឯកឧត្តម នាយឧត្តមសេនីយ៍ រដ្ឋលេខាធិការ មានប្រសាសន៍ស្វាគមន៍ និងបើកអង្គប្រជុំរួចមក ថ្នាក់ដឹកនាំ រួមទាំងសមាជិកនៃគណៈកម្មការរៀបចំចាត់ចែងការបណ្ដែតប្រទីប របស់ក្រសួងមហាផ្ទៃ បានជជែកផ្លាស់ប្តូរមតិយោបល់ ទាំងបច្ចេកទេស បញ្ហាប្រឈម និងបទពិសោធការងារដែលបានជួបប្រទះនាពេលកន្លង ដើម្បីដាក់ជូនអង្គប្រជុំពិនិត្យ និងពិភាក្សា។

ក្រោយពីទទួលបានការចូលរួមមតិយោបល់ល្អៗខាងលើ ឯកឧត្តម រដ្ឋលេខាធិការ មានសង្ឃឹម និងជឿជាក់ថា សមាជិកនៃគណៈកម្មការរៀបចំចាត់ចែងការបណ្ដែតប្រទីបទាំងអស់ នឹងរួមគ្នាចូលរួមយកចិត្តទុកដាក់ឱ្យបានខ្ពស់ ដើម្បីធ្វើយ៉ាងណាឱ្យការរៀបចំចាត់ចែងការងារបណ្ដែតប្រទីបនេះប្រព្រឹត្តទៅដោយរលូន និងជោគជ័យ នាឱកាសព្រះរាជពិធីបុណ្យអ៊ុទូក បណ្ដែតប្រទីប អកអំបុក និងសំពះព្រះខែ នៅថ្ងៃទី២៦ ២៧ និង២៨ ខែវិច្ឆិការ ឆ្នាំ២០២៣ខាងមុខនេះ៕