នាយករដ្ឋមន្ត្រី ហ៊ុន ម៉ាណែត ប្រាប់អគ្គលេខាធិការUN ថារដ្ឋភិបាលអាណត្តិថ្មីនឹងបន្តគោលនយោបាយ និងកិច្ចសហប្រតិបត្តិការជាមួយUN មិនមានការផ្លាស់ប្តូរឡើយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជម្រាបជូន ឯកឧត្តម អង់តូនីញ៉ូ ហ្វូទរ៉េស អគ្គលេខាធិការអង្គការ សហប្រជាជាតិ ថារាជរដ្ឋាភិបាលកម្ពុជាក្រោមការដឹកនាំរបស់ សម្តេចធិបតី នឹងបន្តនូវគោលនយោបាយ និងកិច្ចសហប្រតិបត្តិការជាមួយអង្គការសហប្រជាជាតិដោយ មិនមានការផ្លាស់ប្តូរឡើយ។

សម្ដេចធិបតី ហ៊ុន ម៉ាណែត បានប្រាប់ក្នុងឱកាសដែលសម្តេច បានដឹកនាំគណៈប្រតិភូ ចូលជួបសម្ដែងការគួរសម ជាមួយឯកឧត្តមអគ្គលេខាធិការអង្គការ សហប្រជាជាតិ នាទីស្នាក់ការកណ្តាលអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក នាព្រឹកថ្ងៃសុក្រ ៨កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២២ ខែកញ្ញា ឆ្នាំ២០២៣។

សម្ដេចធិបតី ហ៊ុន ម៉ាណែត បានបញ្ជាក់ថា ជាក់ស្ដែងកម្ពុជាបន្តចូលរួមនៅក្នុងកិច្ចប្រតិបត្តិការថែរក្សា និងកសាង សន្តិភាព ក្រោមឆ័ត្ររបស់អង្គការសហប្រជាជាតិ ដោយបានបញ្ជូនមន្ត្រីជំនាញខាងដោះមីន និងជំនាញផ្សេងទៀត ទៅបំពេញបេសកកម្ម ក្រៅប្រទេស ដែលមានចំនួនប្រមាណជាង ៩,០០០ពាន់នាក់ គិតមកដល់សព្វថ្ងៃនេះ ៕