លោកជំទាវ ពេជ ចន្ទមុន្នី អរគុណដល់ពលរដ្ឋខ្មែរដែលបានគាំទ្ររហូតកម្ពុជាបានជាប់ជាម្ចាស់ផ្ទះ ក្នុងការរៀបចំសន្និបាតសមាគមកាយឫទ្ធិនារីពិភពលោកលើកទី៣៩ ឆ្នាំ២០២៦

ភ្នំពេញ៖ លោកជំទាវ ពេជ ចន្ទមុន្នី អគ្គស្នងការនៃសមាគមកាយឫទ្ធិនារីកម្ពុជា បានអរគុណដល់ពលរដ្ឋខ្មែរដែលបាន LIKE SHARE និង Comments ដ៏ច្រើនសន្ធឹកសន្ធាប់ រហូតដល់កម្ពុជាបានជាប់ជាម្ចាស់ផ្ទះរៀបចំសន្និបាតសមាគមកាយឫទ្ធិនារីពិភពលោកលើកទី៣៩ កាលពីថ្ងៃទី៣១ ខែកក្កដា ឆ្នាំ២០២៣។

តាមរយៈបណ្ដាញសង្គមហ្វេសប៊ុក លោកជំទាវ ពេជ ចន្ទមុន្នី បានលើកឡើងថា ជោគជ័យដ៏មហាវិសេសវិសាលនិងមានតម្លៃជាប្រវត្តិសាស្រ្តនេះ លោកស្រីបានក្រាបថ្វាយបង្គុំទូលថ្វាយ ព្រះសម្តេចព្រះរាជអគ្គមហេសី នរោត្តម មុនីនាថសីហនុ ដែលទ្រង់គង់ជាព្រះប្រធានកិត្តិយសសមាគមកាយឫទ្ធិនារីកម្ពុជា នូវលទ្ធផលដ៏ត្រចះត្រចង់សម្រាប់ជាតិមាតុភូមិកម្ពុជា។

លោកជំទាវ ពេជ ចន្ទមុន្នី ថ្លែងថា មហាលទ្ធផលជាប្រវត្តិសាស្ត្រនេះជាកំណត់ត្រាមួយដែលឆ្លុះបញ្ជាំងពីទស្សនៈវិស័យ ដឹកនាំដ៏ត្រឹមត្រូវរបស់សមាគមឫទ្ធិនារីកម្ពុជាកន្លងមក បង្ហាញពីស្ថានភាព ស្ថេរភាព សុខសន្តិភាពក្នុងផ្ទៃប្រទេសកម្ពុជា និងមុខមាត់ កិត្តិយសជាតិលើឆាកអន្តរជាតិ។

លោកជំទាវថា ការចូលរួមយ៉ាងសស្រាក់សស្រាំពីសមាជិក សមាជិកា ប្រជាពលរដ្ឋខ្មែរទាំងក្នុងនិងក្រៅប្រទេសបានចូលរួមបំផុសទឹកចិត្ត ស្មារតី ការគាំទ្រតាមគ្រប់រូបភាព ដែលធ្វើឱ្យប្រទេសកម្ពុជាត្រូវបានបោះឆ្នោតផ្តល់ទំនុកចិត្តធ្វើជាម្ចាស់ផ្ទះរៀបចំសន្និបាតសមាគមកាយឫទ្ធិនារីពិភពលោកនៅឆ្នាំ២០២៦ ខាងមុខនេះ។

ជាមួយគ្នានេះលោកជំទាវ ពេជ ចន្ទមុន្នី បានថ្លែងអំណរគុណដល់ក្រុមការងារគាំទ្រគ្រប់ផ្នែក និងបណ្តាញសារព័ត៌មានគ្រប់ស្ថាប័នដែលបានចូលរួមផ្សព្វផ្សាយនិងចលនាឲ្យមានការគាំទ្រដល់ការបោះឆ្នោត រហូតកម្ពុជាទទួលជ័យជម្នះជាប់ជាស្ថាពរ។

លោកជំទាវ ពេជ ចន្ទមុន្នី បានបេ្តជ្ញាបន្តដឹកនាំសមាគមកាយឫទ្ធិនារីកម្ពុជា ស្របតាមកទស្សនៈវិស័យច្បាស់លាស់ ដើម្បីជួយកុមារី និងយុវតីកម្ពុជាឲ្យមានសមត្ថភាព សីលធម៌ និងគុណធម៌។

គូសបញ្ជាក់ថា កម្ពុជានឹងធ្វើជាម្ចាស់ផ្ទះរៀបចំសន្និបាតសមាគមកាយឫទ្ធិនារីពិភពលោកលើកទី៣៩ ឆ្នាំ២០២៦ នៅខេត្តសៀមរាប៕