ឯកឧត្តម លឹម គានហោ អញ្ជើញជួបសំណេះសំណាល សាកសួរសុខទុក្ខ ផ្សព្វផ្សាយគោលនយោបាយគណបក្ស និងណែនាំពីការគូសសន្លឹកឆ្នោតជាមួយនិវត្តជនទូទាំងស្រុកពញាឮ

ភ្នំពេញ៖ ឯកឧត្តម លឹម គានហោ រដ្ឋមន្រ្តីក្រសួងធនធានទឹក និងឧតុនិយម និងជាប្រធានក្រុមការងារគណបក្សចុះមូលដ្ឋានស្រុកពញាឮ រួមជាមួយឯកឧត្តម លោកជំទាវ អស់លោក លោកស្រីជាក្រុមការងារ នាព្រឹកថ្ងៃអាទិត្យ ១៤រោច ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែកក្កដា ឆ្នាំ ២០២៣ បានអញ្ជើញជួបសំណេះសំណាល សាកសួរសុខទុក្ខ ផ្សព្វផ្សាយគោលនយោបាយគណបក្ស និងណែនាំពីការគូសសន្លឹកឆ្នោតជាមួយបងប្អូននិវត្តជន​ក្នុងស្រុកពញាឮខេត្តកណ្តាល ចំនួន ២៥០នាក់ នាស្នាក់ការគណបក្សស្រុក។

មានមតិសំណេះសំណាលនាឱកាសនេះ ឯកឧត្តមប្រធានក្រុមការងារ បានលើកឡើងថា ក្រោមម្លប់នៃសុខសន្តិភាពពេញលេញដែលជាផ្លែផ្កានៃនយោបាយឈ្នះឈ្នះ របស់សម្តេចតេជោនាយករដ្ឋមន្រ្តី បានប្រែក្លាយពីស្ថានភាពនៃការបំផ្លិចបំផ្លាញដោយសារវិនាសកម្មសង្គ្រាម មកជាមានការអភិវឌ្ឍរីកចម្រើនជាលំដាប់លើគ្រប់វិស័យ ហើយក៏កំពុងបន្តពង្រឹង និងពង្រីកសក្តានុពលរបស់ខ្លួនឆ្ពោះទៅរកវឌ្ឍនភាពរុងរឿងបន្ថែមទៀត ក្រោមកិច្ចខិតខំប្រឹងប្រែងយ៉ាងសកម្មរបស់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋនៅទូទាំងប្រទេស។ សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត តែងតែបានគិតគូរ និងយកចិត្តទុកដាក់ជួយដោះស្រាយទុក្ខលំបាករបស់បងប្អូននិវត្តជន ពិសេសក្នុងការកសាងអភិវឌ្ឍប្រទេសជាតិ ជាមួយនឹងគោលបំណងអាទិភាពចម្បងបំផុត គឺសេចក្តីសុខសាន្ត និងជីវភាពសម្បូរសប្បាយរបស់ប្រជាពលរដ្ឋ។

ក្រោយ​ពី​ស្តាប់​នូវ​សំណូមពរ​របស់​បងប្អូន​និវត្ត​ជន​ ឯកឧត្ដម​ប្រធាន​ក្រុម​ការងារ​ បាន​ទទួល​យក​ និងសម្រេច​ធ្វើ​ការ​ដោះ​ស្រាយ​ជូន​ពួក​គាត់​ ជាមួយគ្នានេះ ឯកឧត្តមប្រធានក្រុមការងារ បានធ្វើការផ្តាំផ្ញើដល់បងប្អូននិវត្តជន ក៏ដូចជាប្រជាពលរដ្ឋទាំងអស់ក្នុងស្រុកពញាឮ ប្តេជ្ញាបន្តគាំទ្រនូវរាល់សកម្មភាពដឹកនាំរបស់រាជរដ្ឋាភិបាលដោយឥតងាករេ និងសូមគាំទ្រ សម្ដេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់អាណត្តិទី៧ និងអាណត្តិបន្តបន្ទាប់ និងសូមគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេន និងសូមអញ្ជើញទៅបោះឆ្នោតជ្រើសតាំងតំណាងរាស្ត្រ សម្រាប់នីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខ ដែលគណបក្សប្រជាជនកម្ពុជា ដែលមានលេខរៀងទី១៨ ឲ្យបានគ្រប់ៗគ្នា។​

បន្ទាប់​មក​ ឯកឧត្តម​ប្រធាន​ក្រុម​ការងារ​ ក៏បានអញ្ជេីញ​ចុះ​ដឹកនាំ​ដង្ហែរ​ក្បួនយុទ្ធនាការឃោសនាបោះឆ្នោតក្នុង​ឃុំ​ទាំង​១​១​ ផងដែរ​ ៕