ឯកឧត្តម សុខ លូ ទទួលជួបសម្ដែងការគួរសម ជាមួយ សមាគមរាជសីហ៍ ដើម្បីពិភាក្សាការងារ និងរាយការណ៍អំពីសមិទ្ធផលការងារមនុស្សធម៌របស់សមាគម
ភ្នំពេញ៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នារសៀលថ្ងៃព្រហស្បតិ៍ ៥កើត ខែបឋមាសាឍ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២២ ខែមិថុនា ឆ្នាំ២០២៣ បានអញ្ជើញទទួលជួបសម្ដែងការគួរសម ជាមួយ សមាគមរាជសីហ៍ ដែលដឹកនាំដោយ ឯកឧត្តម ស៊ូម សារឿន ប្រធានសមាគមរាជសីហ៍ ដើម្បីពិភាក្សាការងាររវាងរដ្ឋបាលខេត្តបាត់ដំបង និងសមាគមរាជសីហ៍ និងរាយការណ៍អំពីសមិទ្ធផលការងារមនុស្សធម៌ និងកិច្ចការមួយចំនួនដែលសមាគមបានសម្រេចបាន។
សមាគមរាជសីហ៍ត្រូវបានបង្កើតឡើងនៅឆ្នាំ២០១៩ ដោយមានការទទួលស្គាល់ពីរាជរដ្ឋាភិបាលកម្ពុជា តាមរយៈក្រសួងមហាផ្ទៃ ហើយបច្ចុប្បន្ននេះមានសមាជិក សមាជិកាចំនួន ៦,០២៥អង្គ/នាក់ និងមានសមាគមប្រចាំរាជធានី ខេត្ត និងសាខាប្រទេសថៃ វៀតណាម ប្រទេសជប៉ុន ប្រទេសកូរ៉េខាងត្បូង និងប្រទេសម៉ាឡេស៊ី ចំនួន៣០ ព្រមទាំងមានអនុសាខាសមាគមរាជសីហ៍ចំនួន៣៤។ ដោយឡែកនៅខេត្តបាត់ដំបង សមាគមក៏បានបង្កើតសាខាខេត្តបាត់ដំបង តាមសេចក្ដីសម្រេចលេខ ១២៤/២២ ស.រ.ស ចុះថ្ងៃទី៦ ខែកក្កដា ឆ្នាំ២០២២ ដោយមកដល់ពេលនេះសមាគមមានសមាជិក ចំនួន ៤២៦នាក់។
ឆ្លៀតក្នុងឱកាសនេះដែរ សមាគមក៏បាននាំយកនូវអំណោយជាគ្រឿងឧបភោគបរិភោគ ដូចជា៖ អង្ករចំនួន ១,០០០គីឡូក្រាម, មីកម្ពុជា ចំនួន ១០០កេស, ទឹកបរិសុទ្ធ ចំនួន ១០០កេស, ទឹកត្រី ចំនួន ៥០យួរ និងទឹកស៊ីអ៊ីវចំនួន ៥០យួរ ជូនដល់រដ្ឋបាលខេត្ត សម្រាប់យកទៅប្រើប្រាស់តាមការចាំបាច់របស់រដ្ឋបាលខេត្ត
ក្នុងកិច្ចការងារមនុស្សធម៌សម្រាប់ប្រជាពលរដ្ឋនៅតាមមូលដ្ឋាន ៕
