ក្រុមការងារចុះជួយស្រុកមោងឫស្សី ជំរុញឱ្យយុវជនចូលរួមលេងកីឡាឱ្យបានច្រើន ដើម្បីបង្កើនសាមគ្គីភាព សុខភាព និងជៀសឆ្ងាយពីគ្រឿងញៀន

បាត់ដំបង៖ ក្រុមការងារចុះជួយស្រុកមោងឫស្សី ដែលដឹកនាំដោយឯកឧត្តម អង្គ វង្ស វឌ្ឍនា ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមការងារ ចុះជួយស្រុកមោងឫស្សី និងឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាអនុប្រធានទី១ ក្រុមការងារចុះជួយស្រុកមោងឫស្សី បានជំរុញឱ្យយុវជនចូលរួមលេងកីឡាឱ្យបានច្រើន ដើម្បីបង្កើនសាមគ្គីភាព និងសុខភាព ព្រមទាំងជៀសឆ្ងាយពីអំពើអបាយមុខ ជាពិសេសគ្រឿងញៀន។

ការជំរុញនេះ បានធ្វើឡើងខណៈដែលឯកឧត្តម អង្គ វង្សវឌ្ឍនា និងឯកឧត្តម កើត រិទ្ធ ព្រមទាំងក្រុមការងារ បានចូលរួមពិធីបើកការប្រកួតបាល់ទះ ដើម្បីអភិវឌ្ឍភូមិ-ឃុំ ប្រចាំស្រុកមោងឫស្សី នៅក្នុងបរិវេណអនុវិទ្យាល័យមោងឫស្សី ដោយមានការចូលរួមពីក្រុមកីឡាបាល់ទះ មកពីឃុំទាំង៩ របស់ស្រុកមោងឫស្សី។

មានប្រសាសន៍ក្នុងឱកាសនោះ ក្នុងនាមឯកឧត្តមទេសរដ្ឋមន្ត្រី អង្គ វង្សវឌ្ឍនា, លោក កើត រិទ្ធ អនុប្រធានទី១ ក្រុមការងារ បានឱ្យដឹងថា នេះជាព្រឹត្តិការណ៍កីឡាធំទី២ ដែលក្រុមការងារចុះជួយស្រុងមោងឫស្សី បានរៀបចំ ក្នុងនោះ ព្រឹត្តិការណ៍ប្រកួតកីឡាបាល់ទាត់ ដែលជាព្រឹត្តិការណ៍ធំទី១ ទើបតែបានបញ្ចប់កាលពីពេលថ្មីៗនេះ។

ឯកឧត្តម កើត រិទ្ធ បានមានប្រសាសន៍ថា ការរៀបចំព្រឹត្តិការណ៍កីឡានេះ គឺដើម្បីជំរុញឱ្យយុវជនក្នុងស្រុកមោងឫស្សី ចូលរួមលេងកីឡាឱ្យបានច្រើន ដើម្បីពង្រឹងសាមគ្គីភាព និងសុខភាព ជៀសចាកឆ្ងាយពីអំពើអបាយមុខនានា ជាពិសេសគឺគ្រឿងញៀន។

ឯកឧត្តម កើត រិទ្ធ ក៏បានលើកឡើងបន្ថែមថា ពាក់ព័ន្ធវិស័យកីឡានេះ ប្រជាជនកម្ពុជា ពិតជាមានមោទនភាពយ៉ាងខ្លាំង ដោយសារតែ កម្ពុជា បានរៀបចំនូវព្រឹត្តិការណ៍កីឡាស៊ីហ្គេម ដែលទទួលបានជោគជ័យយ៉ាងខ្លាំង និងដោយមានការកោតសរសើរពីប្រទេសនៅក្នុងតំបន់ និងពិភពលោក។ ក្រៅពីទទួលបានជោគជ័យក្នុងការរៀបចំបានយ៉ាងល្អឥតខ្ចោះហើយ កម្ពុជា ក៏ទទួលបានមេដាយយ៉ាងច្រើនសន្ធឹកសន្ធាប់ ស្ថិតក្នុងចំណាត់ថ្នាក់ទី៤ ជាប្រវត្តិសាស្ត្រដែលមិនធ្លាប់មានពីមុនមក។ ជាមួយគ្នានេះ តាមរយៈព្រឹត្តិការណ៍ស៊ីហ្គេម កេរ្តិ៍ឈ្មោះកម្ពុជា បានល្បីរន្ទឺលើឆាកអន្តរជាតិ និងត្រូវបានប្រសិទ្ធនាមថា ជាប្រទេសតូច តែបេះដូងធំ។

ឯកឧត្តម កើត រិទ្ធ ក៏បានបញ្ជាក់ថា ការដែលកម្ពុជា អាចមានលទ្ធភាពរៀបចំកីឡាស៊ីហ្គេមបាន ក៏ដោយសារកម្ពុជា មានសុខសន្តិភាពពេញផ្ទៃប្រទេស និងមានការអភិវឌ្ឍរីកចម្រើន។ ក្នុងន័យនេះ ឯកឧត្តម ក៏បានជំរុញឱ្យយុវជនទាំងអស់ ចូលរួមពង្រឹង និងថែរក្សាសន្តិភាព ឱ្យបានគង់វង្ស ខ្មែរសាមគ្គីគ្នា ខ្មែរអាចធ្វើបាន និងបន្តផ្តល់ឱកាសឱ្យមានការអភិវឌ្ឍលើគ្រប់វិស័យជាបន្តទៀត សម្រាប់ពេលបច្ចុប្បន្ន និងអនាគត។

សូមបញ្ជាក់ថា ក្រោមការដឹកនាំពីឯកឧត្តម អង្គ វង្សវឌ្ឍនា និងឯកឧត្តម កើត រិទ្ធ ក្រុមការងារស្រុកមោងឫស្សី បានរៀបចំនូវព្រឹត្តិការណ៍ជាបន្តបន្ទាប់ ដោយមានការចូលរួមគាំទ្រពីសិស្សានុសិស្ស យុវជន និងប្រជាពលរដ្ឋនៅក្នុងមូលដ្ឋានយ៉ាងច្រើន ដែលនេះបង្ហាញឱ្យឃើញពីសាមគ្គីភាព មិត្តភាព នៃប្រជាពលរដ្ឋក្នុងស្រុកមោងឫស្សីទាំងមូល៕