ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា លោកគ្រូ សាន សុជា ដែលទើបនឹងលាចាកសិក្ខាបទ (សឹក) បានគោរពស្នើសុំសម្ដេចចូលជួបសម្ដែងការគួរសម នាថ្ងៃនេះ ។
ក្នុងពិធីជួបសំណេះសំណាលជាមួយកម្មករកម្មការិនី ក្នុងខណ្ឌពោធិ៍សែនជ័យ រាជធានីភ្នំពេញ នៅថ្ងៃទី១៣ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានមានប្រសាសន៍ថា លោកគ្រូ សាន សុជា បានត្រឡប់ពីប្រទេសអូស្ត្រាលី មកដល់ខេត្តសៀមរាប កាលពីថ្ងៃ១១ ខែមិថុនា ឆ្នាំ២០២៣ ហើយក៏បានទាក់ទងគ្នាជាមួយសម្តេច និងសម្រេចរើសយកម៉ោង ១០ព្រឹកថ្ងៃទី១៣ ខែមិថុនានេះ ដើម្បីជួបគ្នានៅភូមិគ្រឹះរបស់សម្តេច នាក្រុងតាខ្មៅ។
សម្តេតេជោ ហ៊ុន សែន ថ្លែងថា «អន្ទិត សាន សុជា ជាអ្នកចេះធម៌ច្រើនគួរសម»។
សូមជម្រាបថា ភិក្ខុវជិរប្បញ្ញោ សាន សុជា បានលាចាកសិក្ខាបទ កាលពីថ្ងៃទី២១ ខែឧសភា ឆ្នាំ២០២៣ នៅប្រទេសអូស្ត្រាលី បន្ទាប់ពីសាងផ្នួសអស់រយៈពេល ៣១វស្សា។ លោកគ្រូ សាន សុជា កើតនៅឆ្នាំ១៩៧៦ នៅភូមិទួលតាអុក ឃុំកំពង់យោល ស្រុកត្រាំកក់ ខេត្តតាកែវ ៕
