កម្លាំងនគរបាលខេត្តពោធិ៍សាត់ ចុះបង្ក្រាបករណីលេងល្បែងស៊ីសងខុសច្បាប់ និងឃាត់ខ្លួនអ្នកប្រព្រឹត្តបានចំនួន ០៤នាក់
ភ្នំពេញ៖ កម្លាំងអន្តរាគមន៍ស្រុកបាកាន សហការជាមួយកម្លាំងស្នងការដ្ឋាននគរបាលខេត្តពោធិ៍សាត់ នៅថ្ងៃទី២៣ ខែមីនា ឆ្នាំ២០២៣ វេលាម៉ោង១៣:៣០នាទី បានចុះបង្ក្រាបករណីលេងល្បែងស៊ីសងខុសច្បាប់ (ជល់មាន់) នៅចំណុចដីទួលព្រៃអូរដោម ព្រំប្រទល់ឃុំបឹងខ្នារ និងឃុំអូរតាប៉ោង ស្ថិតនៅភូមិអូរតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់ ។
លោកវរសេនីយ៍ឯក នាង វុធ អធិការនគរបាលស្រុកបាកាន បានឲ្យដឹងថា កម្លាំងអន្តរាគមន៍ស្រុកបាកានចំនួន ០៦នាក់ ដឹកនាំដោយលោកវរសេនីយ៍ទោ សុង គឹមសែ ឋាន:អធិការរង សហការជាមួយកម្លាំងស្នងការដ្ឋាននគរបាលខេត្តពោធិ៍សាត់ចំនួន ១៣នាក់ ដឹកនាំដោយលោកវរសេនីយ៍ឯក ហោ សំអាត ស្នងការរង នៃស្នងការដ្ឋាននគរបាលខេត្តពោធិ៍សាត់ បានចុះបង្ក្រាបល្បែងសុីសងខុសច្បាប់ (ជល់មាន់) ខាងលើ និងបានឃាត់អ្នកលេងល្បែងស៊ីសងខុសច្បាប់ចំនួន ០៤នាក់រួមមាន៖
១-ឈ្មោះ ញ៉ូវ អេង ភេទប្រុស អាយុ៦២ឆ្នាំ រស់នៅភូមិស្វាយដូនកែវ ឃុំស្វាយដូនកែវ
២-ឈ្មោះ អេង សាវី ភេទប្រុស អាយុ៥៤ឆ្នាំ រស់នៅភូមិ ស្ដុកប្រវឹក ឃុំស្ដុកប្រវឹក ស្រុករុក្ខគីរី ខេត្តបាត់ដំបង (ម្ចាស់រថយន្ត)
៣-ឈ្មោះ ទេព សារឿន ភេទប្រុស អាយុ៥៨ឆ្នាំ រស់នៅភូមិស្វាយដូនកែវ ឃុំស្វាយដូនកែវ ស្រុកបាកាន ខេត្តពោធិ៍សាត់
៤-ឈ្មោះ ផៃ ណាង ភេទប្រុស អាយុ៤៧ឆ្នាំ រស់នៅភូមិអ្នកតាទ្វារ ឃុំឬស្សីក្រាំង ស្រុកមោងឬស្សី ខេត្តបាត់ដំបង ។
វត្ថុតាងដកហូតបានរួមមាន៖
-រថយន្ត ០១គ្រឿង ម៉ាកលុចស៊ីស Rx-330 ស្លាកលេខបាត់ដំបង 2B-5501
-ម៉ូតូចំនួន ១១គ្រឿង
-មាន់ជល់ចំនួន ០៦ក្បាល
-សៃវៀនមាន់ចំនួន ០៣
-ឆ្នាំងដាំទឹកចំនួន ០១
-ធុងស្ពេត្រូ ០១
-កាបោយដងទឹក ០២
-ជញ្ជីងថ្លឹងមាន់ចំនួន ០១
-ស្បែកជើងចំនួន ០៥គូរ
-កាំបិតខ្វេវចំនួន ០១ ។
បច្ចុប្បន្នអ្នកប្រព្រឹត្ត និងវត្ថុតាងខាងលើ ត្រូវបានសមត្ថកិច្ចបញ្ជូនមកកាន់ស្នងការនគរបាលខេត្តពោធិ៍សាត់ ដើម្បីធ្វើការសួរនាំបង្កសំណុំរឿងតាមនីតិវិធី ៕
