ឯកឧត្តម រស់ វណ្ណា ដឹកនាំកិច្ចប្រជុំពិភាក្សាអំពីវឌ្ឍនភាពការងារនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្រុងតាខ្មៅ ជាមួយក្រុមហ៊ុនទីប្រឹក្សាបច្ចេកទេស

ភ្នំពេញ៖ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន នារសៀលថ្ងៃចន្ទ ៨កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២៣ បានអញ្ជើញដឹកនាំកិច្ចប្រជុំពិនិត្យពិភាក្សាអំពីវឌ្ឍនភាពគម្រោងគិតត្រឹមចុងខែកុម្ភៈ ជាមួយក្រុមហ៊ុនទីប្រឹក្សាបច្ចេកទេស DOHWA Engineering Co., Ltd. និងក្រុមហ៊ុន Seoyoung Engineering Co., Ltd. តាមប្រព័ន្ធវីដេអូពីចម្ងាយ ដើម្បីពិភាក្សាអំពីវឌ្ឍនភាពការងារនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្រុងតាខ្មៅ ក្រោមឥណទានសម្បទានពីធនាគារនីហរ័ណ អាហរ័ណកូរ៉េ ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ និងថ្នាក់ដឹកនាំទទួលបន្ទុក មន្ត្រីជំនាញបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ និងភាគីពាក់ព័ន្ធគ្រប់គ្រងគម្រោងផងដែរ។

អង្គប្រជុំបានពិភាក្សាលើការកំណត់ពេលវេលាផ្ដល់ឯកសាររបាយការណ៍រចនាប្លង់បច្ចេកទេសលម្អិត ពិនិត្យពិភាក្សាអំពីវឌ្ឍនភាពគម្រោង និងរបាយការណ៍ពង្រាងចុងក្រោយនៃគម្រោង ដើម្បីជំរុញឱ្យការងារនេះអាចអនុវត្តទៅបានដោយរលូនតាមផែនការដែលបានគ្រោងទុក។

ថ្លែងក្នុងកិច្ចប្រជុំនាឱកាសនោះ ឯកឧត្តមរដ្ឋលេខាធិការ បានផ្ដល់អនុសាសន៍ដល់ក្រុមហ៊ុនទីប្រឹក្សាបច្ចេកទេសរៀបចំឯកសាររបាយការណ៍រចនាប្លង់បច្ចេកទេសលម្អិត និងរបាយការណ៍ពង្រាងចុងក្រោយនៃគម្រោងឱ្យបានរួចរាល់ ត្រឹមខែកុម្ភៈ ឆ្នាំ២០២៣ ហើយបញ្ជូនមកក្រសួងសាធារណការ និងដឹកជញ្ជូន ដើម្បីអាចឱ្យក្រុមការងារបច្ចេកទេសបន្តអនុវត្តកិច្ចការជំហានបន្ទាប់សម្រាប់គម្រោងបាន។

ជាលទ្ធផល កិច្ចប្រជុំបានឯកភាពជាស្មារតីរួមលើចំណុចសំខាន់ៗ មានដូចជា៖
១. តម្រូវឱ្យក្រុមហ៊ុនទីប្រឹក្សាបច្ចេកទេសផ្តល់នូវព័ត៌មានឱ្យកាន់តែលម្អិត និងសុក្រឹតពាក់ព័ន្ធនឹងគម្រោងទាំងមូល
២. ក្រុមហ៊ុនត្រូវកែសម្រួលឯកសារដោយផ្អែកលើស្មារតីអង្គប្រជុំរបស់ក្រុមការងារបច្ចេកទេស នាថ្ងៃទី២០-កុម្ភៈ-២០២៣
៣. កំណត់យកថ្ងៃទី០៧-មីនា-២០២៣ ខាងមុខសម្រាប់កិច្ចប្រជុំគណៈកម្មការវិវេចនាលទ្ធកម្ម ដើម្បីបន្តពិភាក្សាពិនិត្យឯកសារខាងលើ
៤. ចុងក្រោយក្រុមហ៊ុនត្រូវរៀបចំឯកសារឱ្យរួចរាល់តាមចំណុច១ និង២ ខាងលើ និងឯកសារចាំបាច់ដទៃទៀតសម្រាប់កិច្ចប្រជុំបន្ទាប់ដូចបានកំណត់ខាងលើ ៕