បាត់ដំបង៖ ទឹកធ្លាក់អូរជាំ ស្ថិតក្នុងភូមិសាស្រ្ត ដែនជម្រកសត្វព្រៃភ្នំសំកុសនៃភូមិអូរជាំលើ ឃុំកំពុងល្ពៅ ស្រុកសំឡូត ខេត្តបាត់ដំបង មានចំងាយ១០០គីឡូម៉ែត្រជាងពីទីរួមខេត្តបាត់ដំបង ទឹកធ្លាក់ខួបប្រាំង ខួបវស្សា មួយនេះទាក់ទាញភ្ញៀវទេសចរណ៍ មកលេងកម្សាន្ត និងបោះតង់សម្រាកលំហែរ យ៉ាងច្រើនកុះករ ជារៀងរាល់ចុងសប្តាហ៍។
មន្ទីរទេសចរណ៍ខេត្តបាត់ដំបងបានឲ្យដឹងថា ប្រភពទឹកដែលហូរមកទឹកធ្លាក់អូរជាំ គឺបឹងដ៏ធំ ដែលអ្នកស្រុកហៅតៗគ្នាថា«ទន្លេផែន» ស្ថិតនៅរយៈកម្ពស់១៤០០ម លើកំពូលភ្នំសំកុស មានសម្រស់ដ៏ស្រស់ស្អាត កំពុងលាក់ខ្លួនក្នុងព្រៃជ្រៅ ក្នុងដែនជម្រកសត្វព្រៃភ្នំសំកុស ក្នុងភូមិសាស្រ្តស្រុកសំឡូត ខេត្តបាត់ដំបង។
ទន្លេផែន មានដើមឈើធំៗខ្ពស់ៗ នៅព័ន្ធជុំវិញបឹងដែលមានទឹកថ្លាឆ្វង់ និងមានបណ្តោយប្រវែងជាង៤០០ម និងទទឹងជាង២០០ម។ អ្នកភូមិដែលធ្លាប់កាន់តំបន់ក្បែរនេះ បានបញ្ជាក់ថា ពីមុនមក កម្រមាននរណាទៅដល់កន្លែងបឹងនេះ ។ កន្លងមក អ្នកភូមិចំនួន៤ទៅ៥នាក់ នៃឃុំអូរជាំ ស្រុកសំឡូត ខេត្តបាត់ដំបង បានទៅរកថ្នាំ បេះក្រវាញ បេះសោម ក្បែរៗនោះប៉ុណ្ណោះ ហើយក៏មិនដែលបានមកសម្រាកក្បែរមាត់បឹងនេះ។
សកម្មភាពកម្សាន្តនានាក្នុងសហគមន៍មានដូចជា៖- ការដើរទស្សនាកម្សាន្តតាមលើភ្នំ និងទឹកជ្រោះដែលមានច្រើនដំណាក់និងផ្តល់នូវរសជាតិអារម្មណ៍ប្លែកៗពីគ្នា- ការងូតទឹកជ្រោះកម្សាន្ត- ការពិសារអាហារប្លែកៗក្នុងតំបន់ ដែលចំអិនដោយប្រើប្រាស់វត្ថុធាតុដើមក្នុងសហគមន៍ផ្ទាល់- ការបោះតង់ស្នាក់នៅប្រកបសុវត្ថិភាពខ្ពស់- ការទស្សនាហ្វូងមេអំបៅ- ការកម្សាន្តពេលរាត្រី ដុតភ្នក់ភ្លើងជាក្រុមៗ- ការសិក្សា ស្រាវជ្រាវ ស្វែងយល់ ពីសហគមន៍- ការទទួលបាននូវបទពិសោធន៍ថ្មីប្លែក ជាមួយនឹងធម្មជាតិនៃបេះដូងរបស់ស្រុកសំឡូត៕
