ក្រសួងបរិស្ថាននឹងរៀបចំវេទិការជាតិកេសរកូលលើកទី៣ ដែលគ្រោងធ្វើឡើងនៅក្នុងខែមីនា ឆ្នាំ២០២៣នេះ

ភ្នំពេញ៖ ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន បានមានប្រសាសន៍ឲ្យដឹងថា ឆ្នាំនេះក្រសួងបរិស្ថាននិងរៀបចំវេទិការជាតិកេសរកូល លើកទី៣ ដែលគ្រោងនឹងធ្វើឡើងនៅក្នុងខែមីនា ឆ្នាំ២០២៣នេះ ហើយរហូតមកដល់ពេលនេះគឺលើកទី៣ហើយដែលក្រសួងបរិស្ថានធ្វើជាម្ចាស់ផ្ទះនៅក្នុងការរៀបចំវេទិការជាតិកេសរកូល។

ថ្លែងប្រាប់ក្រុមអ្នកសារព័ត៌មាន ឯកឧត្តម នេត្រ ភក្រ្តា បានបញ្ជាក់ថា “លើកទី១ និងលើកទី២ គឺយើងមានការអញ្ជើញចូលរួមយ៉ាងច្រើនពីសំណាក់ បងប្អូនប្រជាពលរដ្ឋដែលជាអាជីវករដែលគាត់លក់ផ្កា និងផលិតផ្កា សម្រាប់ផ្គត់ផ្គង់ទីផ្សារហ្នឹងដោយទាំងអស់នោះគឺនាំមកនូវប្រភេទនៃកេសរកូលផ្សេងៗ ទាំង កេសរកូលបង្កាត់ថ្មីទាំងកេសរកូលដែលមាននៅលើទីផ្សារ។ ហើយជាមួយគ្នានេះក្រសួងបរិស្ថានក៏នាំយកនូវប្រភេទកេសរកូលព្រៃ”។

ឯកឧត្តមរដ្ឋលេខាធិការបានបន្ថែមថា គោលបំណងនៃការរៀបចំវេទិកាជាតិកេសរកូលនេះគឺដើម្បី៖

ទី១- បង្ហាញអំពីភាពសម្បូរបែបនៃប្រភេទកេសរកូលរបស់ប្រទេសកម្ពុជារបស់យើង ដែលបច្ចុប្បន្ន នេះបើតាមការប៉ាន់ស្មានគឺកេសរកូលព្រៃរបស់យើងមានប្រមាណជាជាង ៥០០ប្រភេទ ហើយជាមួយនិងការរៀបចំនៅមជ្ឈមណ្ឌលសិក្សានិងស្រាវជ្រាវនិងអភិរក្សកេសរកូល សុខអានភ្នំគូលែន គឺក្រុមមន្ត្រីជំនាញបានធ្វើការសិក្សាប្រមូលពី ខេត្តផ្សេងៗនៅក្នុងនោះរួមមាន៖ ខេត្តព្រះសីហនុ ខេត្តកំពត ខេត្តកោះកុង ខេត្តព្រះវិហារ និងខេត្តសៀមរាបនេះគឺសរុបទៅមាន ៥ពាន់សំណាកដែលមានប្រមាណជា ២១០ប្រភេទនៃកេសរកូលព្រៃ។ នៅក្នុងនោះដែលក៏មានការកំណត់អត្តសញ្ញាណច្បាស់លាស់ហ្នឹងគឺជាង ១០០ប្រភេទហើយ ដែលមន្ត្រីជំនាញកំពុងតែសិក្សាបន្ថែមទៀត ចឹងវេទិកាជាតិកេសរកូលនេះគឺជាឱកាសមួយនៅក្នុងការបង្ហាញអំពីភាពសម្បូរបែបនៃប្រភេទកេសរកូលព្រៃនៅកម្ពុជារបស់យើងមាន។

ទី២- ផ្សព្វផ្សាយឲ្យបានដឹង និងបណ្ដុះស្មារតីប្រជាពលរដ្ឋឲ្យស្រឡាញ់ធនធានធម្មជាតិជាពិសេសគឺអ្វីដែលយើងមានសម្បត្តិធម្មជាតិនេះគឺយើងត្រូវចូលរួមនៅក្នុងការការពារនិងអភិរក្ស។ ហើយវេទិការរបស់យើងនេះក៏ទាញការចាប់អារម្មណ៍ជារួមដល់សាធារណជនក៏ដូចជាអ្នកពាក់ព័ន្ធអំពីការព្រួយបារម្ភ ការបាត់បង់ប្រភេទពូជរបស់យើងដោយសារតែកន្លងទៅនេះមានការធ្វើអាជីវកម្មហួសប្រមាណទៅលើ ប្រភេទកេសរកូលព្រៃ ចឹងបានជាមានការរៀបចំនៅមជ្ឈមណ្ឌលស្រាវជ្រាវនិងអភិរក្សកេសរកូល សុខអានភ្នំគូលែន នេះគឺជាមជ្ឈមណ្ឌលមួយដើម្បីថែរក្សាប្រភេទពូជគង់វង្ស ហើយយើងនឹងពង្រីកបន្ថែមទៀតឲ្យបាន រីកចម្រើនហើយថែរក្សាប្រភេទគឺយើងមាន។

ទី៣- ទាក់ទងជាមួយនឹងការទប់ស្កាត់កុំឲ្យមានការធ្វើអាជីវកម្មហួសជ្រុលទៅលើកេសរកូលព្រៃនេះគឺយើងបានចេញសេចក្ដីណែនាំដល់រដ្ឋបាលរាជធានី ខេត្ត ដែកមាន តំបន់ការពារធម្មជាតិជាពិសេសគឺមន្ត្រីឧទ្យានុរក្សនៃមន្ទីរបរិស្ថានដែលមានតំបន់ការពារធម្មជាតិហ្នឹងគឺសុំឲ្យគាត់ត្រូវគ្រប់គ្រងឲ្យបានល្អទៅលើហ្នឹងហើយក៏ជូនដំណឹងទៅដល់បងប្អូនប្រជាពលរដ្ឋសូមកុំឲ្យធ្វើអាជីវកម្មហួសប្រមាណ។ អាជីវកម្មហួសប្រមាណ មានន័យថាប្រសិនជាយើង បោចយកមកលក់ធម្មតាក្នុងបរិមាណតិចតួចជាការដោះដូរធម្មតាអាហ្នឹងវាមិនអីទេតែការធ្វើអាជីវកម្មហួសប្រមាណគឺវាធ្វើឲ្យប៉ះពាល់ទៅដល់ប្រភេទពួកវាអាចឈានដល់ការបាត់បង់នូវប្រភេទពូជកេសរកូលរបស់យើងចឹងបានជាយើងត្រូវការទាំងការអប់រំផង និងការអនុវត្តច្បាប់ផងដើម្បីថែរក្សា។ ហើយយើងសង្ឃឹមថាអ្វីដែលយើងបាននិងកំពុងតែរៀបចំនេះគឺមជ្ឈមណ្ឌលសិក្សាស្រាវជ្រាវនិងអភិរក្សកេសរកូល សុខអានភ្នំគូលែន នេះគឺជាមជ្ឈមណ្ឌលមួយយើងអាចនិយាយថាជាធនាគារពូជគឺដើម្បីផ្គត់ផ្គង់ទៅតម្រូវការនៅក្នុងស្រុក ពីព្រោះបច្ចុប្បន្នជាមួយនឹងជីវភាពរបស់យើងរីកចម្រើនការរស់នៅរបស់ប្រជាពលរដ្ឋកាន់តែមានភាពស៊ីវិល័យផ្ទះរបស់គាត់គឺមានការតុបតែងនូវគ្រឿងលម្អផ្សេងៗជាពិសេសគឺការដាំផ្កាល្អហើយកេសរកូលនេះគឺជាប្រភេទផ្កាម្យ៉ាង ដែលប្រជាពលរដ្ឋមានការចូលចិត្តក្នុងការដាំលម្អផ្ទះ ចឹងនេះជាចំណុចមួយដែលយើងគិតគូរអំពីនិរន្តរភាពនៃការថែរក្សាសុខភាពទាំងអស់ហ្នឹងឲ្យនៅគង់វង្ស ចឹងបានជាយើងរៀបចំវេទិកាជាតិកេសរកូល នេះគឺនៅក្នុងគោលបំណងដើម្បី៖

ទី១- ធ្វើម៉េចឲ្យប្រជាពលរដ្ឋបានដឹងថាយើងមានកេសរកូលអីខ្លះ ជាកេសរកូលព្រៃនេះដែលជាធនធានធម្មជាតិរបស់យើង។

ទី២- ឲ្យប្រជាពលរដ្ឋចូលរួមការពារថែរក្សាដើម្បីឲ្យរក្សាបានពូជទាំងអស់ហ្នឹងឲ្យវានៅគង់វង្ស ពីព្រោះដូនតារបស់យើងបន្សល់ទុកមកហើយយើងត្រូវតែបន្តថែរក្សាពូជរបស់យើងហ្នឹងឱ្យវានៅគង់វង្សសម្រាប់មនុស្សរាប់ជំនាន់តទៅមុខទៀត។

ទី៣- ជំរុញឲ្យមានការដាំលម្អតាមផ្ទះដែលដើម្បីជាការតុបតែងផង ហើយក៏ជាផ្នែកមួយនៃការបើកឲ្យមានមុខរបរសម្រាប់សហគមន៍សម្រាប់ការផ្គត់ផ្គង់ទៅលើទីផ្សារនៅក្នុងស្រុកដែរ ៕