ភ្នំពេញ៖ រដ្ឋមន្រ្តីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា លោកបណ្ឌិត គុណ ញឹម បានឱ្យដឹងថា គិតមកទល់មកពេលនេះ អគ្គនាយកដ្ឋានគយ និងរដ្ឋាករកម្ពុជា ប្រមូលពន្ធពីរថយន្តគ្មានពន្ធជ្រកក្រោមផ្លាកលេខផ្សេងៗ ទាំងចង្កូតឆ្វេង និងចង្កូតស្តាំបានជាង១០៦លានដុល្លារ ពីរថយន្តជិត២ម៉ឺនគ្រឿង ។
នៅក្នុងសន្និសីទសារព័ត៌មាន បង្ហាញលទ្ធផល «បិទបញ្ចប់ការងារប្រមូលពន្ធអាករ លើរថយន្តគ្មានពន្ធ មានស្រាប់ក្នុងប្រទេស» នារសៀលថ្ងៃទី១២ ខែមករា ឆ្នាំ២០២៣ លោកបណ្ឌិត គុណ ញឹមបានឱ្យដឹងថា ក្នុងយុទ្ធនាការប្រមូលពន្ធពីរថយន្តគ្មានពន្ធដែលជ្រកក្រោមផ្លាកលេខផ្សេងៗ ត្រូវបានបែងចែកជាពីរដំណាក់កាល ដោយមានរថយន្តទាំងចង្កូតស្តាំ និងឆ្វេង ចំនួន ២០០៤៩គ្រឿង បានមកបង់ពន្ធ កក់ប្រាក់ និងចុះបញ្ជី តែក្នុងនោះមានតែរថយន្តចំនួន១៨ ៤១៤គ្រឿងទេ ដែលបានបង់ពន្ធតាមនិតិវិធីច្បាប់ ដោយទទួលបានប្រាក់ពន្ធអាករចំនួន១០៦លានដុល្លារ និងនៅសល់ជិត២ពាន់គ្រឿង ទៀតដែលមិនបានមកបង់ពន្ធតាមនិតិវិធី។
លោកថា ក្នុងយុទ្ធនាការដំណាក់កាលទី១ មានរថយន្តសរុបចំនួន៩៧៥៣គ្រឿង បានមកបំពេញកាតព្វកិច្ចពន្ធ និងកក់ប្រាក់ ដោយទទួលបានចំណូលប្រមាណជាង៧៦លានដុល្លារ។ ក្នុងនោះរថយន្តចង្កូតឆ្វេង ចំនួន២៧១៣គ្រឿង និងរថយន្តចង្កូតស្តាំដែលមកកក់ប្រាក់មានចំនួន ៧០៤០គ្រឿង (តែរថយន្តដែលកក់ប្រាក់ ហើយបង្វែរប្រាក់កក់ទៅជាប្រាក់ពន្ធ មានចំនួន៧០២៧ និងនៅសល់ចំនួន១៣គ្រឿងទៀត មិនបានមកបញ្ចប់និតិបង្វែរប្រាក់កក់ទៅជាប្រាក់បង់ពន្ធ) ។
ចំណែកក្នុងយុទ្ធការដំណាក់កាលទី២ ដែលចាប់ផ្តើមពីថ្ងៃ ៧ ដល់ថ្ងៃទី៣១ខែកក្កដា និងបានពន្យារហូតដល់៣១ធ្នូ ឆ្នាំ២០២២ គយប្រមូលពន្ធជាង៣០លានដុល្លារ ពីរថយន្តចង្កូតស្តាំ និងចង្កូតឆ្វេង។
លោកបានឱ្យដឹងថា ក្នុងដំណាក់កាលទី២នេះ គឺជាដំណាក់ផ្តោតទៅលើការប្រមូលរថយន្តចង្កូតស្តាំដែលមិនកែចង្កូត ក្នុងនោះ មានរថយន្តចំនួនជាង ៩៨៥៥គ្រឿង បានមកចុះបញ្ជី ។ គិតមកដល់ថ្ងៃឱសានគឺថ្ងៃទី៣១ ខែធ្នូ ឆ្នាំ២០២២ មានរថយន្តចំនួន ៧៩១០ គ្រឿង ដែលម្ចាស់បានមកបំពេញកតព្វកិច្ចពន្ធ ដោយប្រមូលបានថវិកាជាង ២៦ លានដុល្លារ ដូច្នេះនៅសល់ ១៩៤៥គ្រឿងទៀត មិនបានមកបំពេញកាតព្វកិច្ចពន្ធទេ។ ទន្ទឹមគ្នានេះ នៅក្នុងដំណាក់កាលទី២នេះ គយក៏បានប្រមូលពន្ធពីរថយន្តចង្វេត ផងដែរ ដោយសារម្ចាស់បានខកខាន ក្នុងការមកបំពេញកាតព្វពន្ធកាលពីដំណាក់កាលទី១ ដែលមានចំនួន៤៤១គ្រឿង និងទទួលបានថវិកាប្រមាណជិត ៤លានដុល្លារ។
លោកបានឱ្យដឹងថា ចំពោះរថយន្តដែលនៅសល់មិនបានមកបំពេញកាតព្វកិច្ចពន្ធទាំងជិត២ពាន់គ្រឿងនេះ ត្រូវបានប៉ាន់ប្រមាណថា រថយន្តមួយគ្រឿងជាប់កាតព្វកិច្ចពន្ធ ជាង៣ពាន់ដុល្លារ ដូច្នេះសុរបទាំងអស់ស្មើនឹងជាង៦លានដុល្លារ៕
