ឯកឧត្តម ជិន ម៉ាលីន ដឹកនាំមន្ត្រីជំនាញចូលរួមកម្មវិធីវិបស្សនាកំណែទម្រង់ ៣ បូក ១ រយៈពេលពីរថ្ងៃ នៅខេត្តសៀមរាប

ភ្នំពេញ៖ ឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ និងជាប្រធានលេខាធិការដ្ឋានអចិន្ត្រៃយ៍ នៃគណៈកម្មាធិការដឹកនាំការកែទម្រង់ច្បាប់ និងប្រព័ន្ធយុត្តិធម៌ អមដោយ ឯកឧត្តម ខាន់ វណ្ណៈ រដ្ឋលេខាធិការក្រសួងយុត្តិធម៌ និងជាអនុប្រធានលេខាធិការដ្ឋានអចិន្ត្រៃយ៍ នៅថ្ងៃទី១៣ ខែកញ្ញា ឆ្នាំ២០២២ បានដឹកនាំមន្ត្រីជំនាញចូលរួមកម្មវិធីវិបស្សនាកំណែទម្រង់ ៣ បូក ១។

វិបស្សនានេះ នឹងប្រព្រឹត្តឡើងមានរយៈពេល ២ ថ្ងៃ ចាប់ពីថ្ងៃទី១៣ ដល់ថ្ងៃទី១៤ ខែកញ្ញា ឆ្នាំ២០២២ ដោយមានការចូលរួមពី លេខាធិការដ្ឋាននៃគណៈកម្មាធិការកែទម្រង់រដ្ឋបាលសាធារណៈ លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ អគ្គលេខាធិការដ្ឋាននៃគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ និងតំណាងអង្គភាពក្រោមចំណុះក្រសួងសេដ្ឋកិច្ច និងហិរញ្ញវត្ថុ សរុប ៥០ រូប។

វិបស្សនា ត្រូវបានរៀបចំឡើងក្នុងគោលបំណង ពិគ្រោះយោបល់ និងចែករំលែកបទពិសោធន៍រវាងការដ្ឋានកែទម្រង់ទាំង៤ និងអង្គភាពជំនាញពាក់ព័ន្ធក្នុងការគាំទ្រយន្តការកែទម្រង់ ៣ បូក ១ ព្រមទាំងពិនិត្យ និងពិភាក្សា លើឯកសារនិងរបៀបវារៈសំខាន់ៗដូចខាងក្រោម៖
១-សេចក្តីព្រាងឯកសារចក្ខុវិស័យនិងយុទ្ធសាស្ត្រ ស្តីពី “សុខដុមនីយកម្មកែទម្រង់ ៣ បូក ១”
២-សេចក្តីព្រាងអនុក្រឹត្យ ស្តីពី “យន្តការសម្របសម្រួលកម្មវិធីកែទម្រង់ ៣ បូក ១” និង
៣-ការរៀបចំទិសដៅអនុវត្តបន្ត៕