រដ្ឋមន្ត្រីអប់រំ៖ ឆ្នាំ២០៣០ ផ្ដោតសំខាន់លើការអប់រំ គុណភាព សមធម៌ បរិយាប័ន្ន និងការលើកកម្ពស់ឱកាស ក្នុងការសិក្សាពេញមួយជីវិតសម្រាប់អ្នកទាំងអស់គ្នា
ភ្នំពេញ៖ ឯកឧត្តមបណ្ឌិតសភាចារ្យ ហង់ ជួនណារ៉ុនរដ្ឋមន្ត្រីក្រសួងអប់រំយុវជន និងកីឡា បានមានប្រសាសន៍ថា ឆ្នាំ២០៣០ គឺផ្ដោតសំខាន់លើការអប់រំ គុណភាព សមធម៌ បរិយាប័ន្ន និងការលើកកម្ពស់ឱកាស ក្នុងការសិក្សាពេញមួយជីវិតសម្រាប់អ្នកទាំងអស់គ្នា។
ការអភិវឌ្ឍនូវធនធានមនុស្សគឺសំដៅសម្រេចឲ្យបាននូវយុវជនម្នាក់ដែលមានជំនាញមួយយ៉ាងពិតប្រាកដប្រចាំជីវិត នេះគឺជាសារលិខិតរបស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសប្រារព្ធទិវាអក្ខរកម្មជាតិ៨ កញ្ញាឆ្នាំ ២០២២ ធ្វើឡើងនៅ វេទិកា ខេត្តបន្ទាយមានជ័យ ក្រោមអធិបតីភាពឯកឧត្តមបណ្ឌិតសភាចារ្យ ហង់ ជួនណារ៉ុនរដ្ឋមន្ត្រីក្រសួងអប់រំយុវជននិងកីឡា ។
ឯកឧត្តម ហង់ ជួនណារ៉ុន បានមានប្រសាសន៍ថា ការប្រារព្ធទិវាអក្ខរកម្មជាតិ៨ កញ្ញាគឺជាការរំឭកឲ្យឃើញថា នៅមានភារៈកិច្ចចម្បងចាំបាច់ជាច្រើនទៀត ក្នុងការជំរុញឲ្យមានកំណើនអត្រាអក្ខរកម្ម ដើម្បីសម្រេចគោលដៅអភិវឌ្ឍន៍ ប្រកបដោយចិរភាពឆ្នាំ២០៣០ ផ្ដោតសំខាន់លើការអប់រំ គុណភាព សមធម៌ បរិយាប័ន្ន និងការលើកកម្ពស់ឱកាស ក្នុងការសិក្សាពេញមួយជីវិតសម្រាប់អ្នកទាំងអស់គ្នា ក្នុងស្មារតី រាជរដ្ឋាភិបាលតែងតែយកចិត្តទុកដាក់ខ្ពស់ ដោយប្រើប្រាស់នូវសក្ដានុពលសមត្ថភាព លទ្ធភាពនិងកាលានុវត្តភាពនិងការលើកកម្ពស់ ការងារអក្ខរកម្ម ពិសេសបង្កលក្ខណៈអំណោយផល ដល់បងប្អូនប្រជាពល រដ្ឋកម្ពុជា ឲ្យបានចូលរួមកាន់តែសកម្មខ្លាំងក្លា ក្នុងការងារនេះដើម្បីបន្តដំណើរលើមាគ៌ាឆ្ពោះទៅរកវឌ្ឍនភាពរុងរឿងនៃសង្គមជាតិកម្ពុជាទាំងមូល។
ឯកឧត្តមបន្តថា ឆ្នាំនេះយើងមានឱកាសបានរៀបចំទិវាអក្ខរកម្មជាតិ ៨កញ្ញា លើកទី២២ នៅទូទាំងរាជធានី-ខេត្ត ដោយមានការខកខាន ការប្រារព្ធពិធីបែបនេះអស់រយៈពេល០២ឆ្នាំ ដោយសារការរីករាលដាលនៃជំងឺកូវីដ-១៩ ក្នុងនោះយើងគ្រាន់តែបានផ្សព្វផ្សាយតាមរយៈ ប្រព័ន្ធអេឡិចត្រូនិកនិងបណ្ដាញសង្គមតែប៉ុណ្ណោះ។
ឯកឧត្ត រដ្ឋមន្ត្រីបានគូសបញ្ជាក់ថា ក្នុងឱកាសនេះដែរស្របពេលដែលសភាពការណ៍ប្រទេសជាតិយើងសម្រេចបាននូវជោគជ័យដ៏ធំធេងក្នុងការប្រយុទ្ធនឹងជំងឺកូវីដ-១៩ និងដាក់ឲ្យដំណើរការមានគ្រប់សកម្មភាពសេដ្ឋកិច្ចសង្គមឡើងវិញយ៉ាងពេញលេញ ប្រជាជនរស់នៅដោយក្ដីសប្បាយរីករាយតាមគន្លងប្រក្រតីភាពថ្មី អញ្ញាតឱ្យយើងបានប្រារព្ធទិវាអក្ខរកម្មនេះឡើង ។ ឆ្នាំនេះក្រសួង អប់រំយុវជន និងកីឡាបានកំណត់យកប្រធានបទ អក្ខរកម្មជាស្ពានឆ្ពោះទៅរកជំនាញមុខរបរនិងការសិក្សាបន្ត នៅពេលដែលប្រទេសកម្ពុជាកំពុងបន្តអភិវឌ្ឍរីកចម្រើនឡើងអក្ខរកម្មដែលជាមូលដ្ឋានគ្រឹះនៃការសិក្សាពេញមួយជីវិត កាន់តែមានសារៈសំខាន់បន្ថែមទៀតដើម្បីអភិវឌ្ឍនូវធនធានមនុស្សបំពេញនូវតម្រូវការនៃសេចក្ដីប្រាថ្នាថ្មីរបស់ប្រទេសកម្ពុជានៅពេលដែលប្រទេសកាន់តែជឿនលឿន ផ្នែកបច្ចេកវិទ្យាព័ត៌មាន ជំនាញអក្ខរកម្មឌីជីថលកាន់តែមានសារៈសំខាន់ ក្នុងការសម្របខ្លួនទៅនឹងវិធីដែលបច្ចេកវិទ្យា បានផ្លាស់ប្តូររបៀបធ្វើ របៀបទំនាក់ទំនង និងអក្ខរកម្មជាមួយគ្នា៕
