ប្រជាពលរដ្ឋ ១គ្រួសារ រងគ្រោះដោយភ្លើងឆេះផ្ទះនៅឃុំកន្ទឺ២ ទទួល អំណោយពីអនុសាខាកាកបាទក្រហមកម្ពុជាស្រុកបាណន់
ភ្នំពេញ៖ នៅថ្ងៃទី៦ ខែកញ្ញា ឆ្នាំ២០២២នេះ ក្រុមការងារអនុសាខាកាកបាទក្រហមកម្ពុជាស្រុកបាណន់ ដឹកនាំដោយ លោកស្រេង សុខា ប្រធានគណៈកម្មាធិការអនុសាខាស្រុកនិងសហការី នាំយក អំណោយមនុស្សធម៌ផ្តល់ ជូនប្រជាពលរដ្ឋរងគ្រោះ ឈ្មោះ លោក អែប សាត ភេទ ប្រុស អាយុ ៧២ ឆ្នាំ បន្ទុកគ្រួសារ ៥ នាក់ ក្នុងនោះស្រី ០២ នាក់ ដែលរគ្រោះដោយអគ្គិភ័យបណ្តាលអោយ១ខ្នងផ្ទះ ធ្វើអំពីថ្ម ទំហំ ៦mX៨m ប្រក់ល្បឿងកាលពីថ្ងៃទី ០៥ ខែ កញ្ញា ឆ្នាំ ២០២២ វេលាម៉ោង ១២ និង ៣០ នាទីយប់ស្ថិតនៅផ្ទះលេខ ២១១ ក្រុម ១៧ ភូមិភ្នំគល់ ឃុំកន្ទឺ២ ស្រុកបាណន់ ខេត្តបាត់ដំបង ដោយមូលហេតុបណ្តាលមកពីឆ្លងចរន្តអគ្គិសនី ។
ក្នុងឱកាសនោះ ស្រេង សុខា បានពាំនាំប្រសាសន៍របស់ ឯកឧត្តម សុខ ផល ប្រធានកិត្តិយសសាខា ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយ ចំពោះឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់គ្រួសាររងគ្រោះ។
ជាមួយគ្នានេះ លោកប្រធានអនុសាខាស្រុក ក៏បានអំពាវនាវ ដល់ប្រជាជនទាំងអស់ សូមមានការប្រុងប្រយ័ត្នចំពោះការប្រើប្រាស់ភ្លើង និងចរន្តអគ្គិសនី ដែលជាប្រភពនៃគ្រោះថ្នាក់ និងបានលើកទឹកចិត្តសូមកុំអស់សង្ឃឹម ហើយប្រឹងប្រែងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសារឡើងវិញ ព្រោះអំណោយដែលបានផ្តល់ជូនពេលនេះ អាចជួយសម្រាលការលំបាកបានមួយគ្រាប៉ុណ្ណោះ។
លោក អែប សាត ក្នុងនាមគ្រួសាររងគ្រោះបានថ្លែងគោរពថ្លែងអំណរ គុណយ៉ាងជ្រាលជ្រៅចំពោះ ក្រុមការងារអនុសាខាកាកបាទក្រហមកម្ពុជាស្រុក ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលបានគិតគូរ មានក្តីមេត្តា ករុណា និងទឹកចិត្តជ្រះថ្លា ជួយដោះស្រាយទុក្ខលំបាកដល់ប្រជាជនរងគ្រោះជួបការលំបាកបានទាន់ពេលវេលា។
អំណោយដែលអនុសាខាផ្តលជូនរួមមាន ៖ អង្ករ ២៥គីឡូក្រាម មី១កេស, ទឹកត្រី ០១យួរ ទឹកស៊ីអ៊ីវ ០១យួរ ត្រីខ ០១យួរ ទឹកបរិសុទ្ធ១កេស ឃីត១កញ្ចប់(មុង ភួយ សារុង)និងថវិការ ៥ម៉ឺនរៀលផងដែ៕
