ឯកឧត្តម ហ៊ុន ម៉ានី ទទួលជួបប្រធានមូលនិធិប្រទេសចិន សម្រាប់សន្តិភាព និងការអភិវឌ្ឍ ប្រចាំកម្ពុជា
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលការជួបសម្តែងការគួរសមពីសំណាក់ លោក Cui Chunlai ប្រធានមូលនិធិប្រទេសចិន សម្រាប់សន្តិភាព និងការអភិវឌ្ឍ(CFPD) ប្រចាំកម្ពុជា និងសហការី នាព្រឹកថ្ងៃទី៣០ ខែសីហា ឆ្នាំ២០២២ នៅទីស្នាក់ការកណ្តាល ស.ស.យ.ក.។
ក្នុងជំនួបនេះដែរ ថ្នាក់ដឹកនាំនៃស្ថាប័នទាំងពីរ បានពិភាក្សាអំពីការបន្តកិច្ចសហប្រតិបត្តិការ និងការពង្រឹងចំណងមិត្តភាពរវាងស្ថាប័នស.ស.យ.ក. និង CFPD តាមរយៈគម្រោងសហការសំខាន់ៗ មួយចំនួនឆ្ពោះទៅមុន ក្នុងគោលដៅរួមគ្នាដើម្បីចូលរួមលើកកម្ពស់ការអភិវឌ្ឍក្នុងផ្នែកអប់រំបណ្តុះបណ្តាល ការងារយុវជន និងកីឡា ព្រមទាំងផ្នែកសុខាភិបាលជាដើម។
សូមជម្រាបជូនថា ស.ស.យ.ក. និង CFPD បាននៅតែបន្តរក្សាទំនាក់ទំនងយ៉ាងជិតស្និត បើទោះបីជាមានការខកខានមួយរយៈក្នុងការជួបពិភាក្សាការងារដោយផ្ទាល់ ដោយសារវិបត្តិកូវីដ១៩ ៕
