ឯកឧត្តម ហ៊ុន ម៉ាណែត និង លោកជំទាវ ឧបត្ថម្ភនូវគ្រឿងឧបភោគ បរិភោគ ជូនដល់អតីតយុទ្ធជន ដែលមានជំងឺកំពុងសម្រាកព្យាបាលនៅផ្ទះ
ភ្នំពេញ៖ លោកវរសេនីយ៍ឯក ភើយ លំអង មេបញ្ជាការរង នាយសេនាធិការ តំណាងលោកមេបញ្ជាការ តំបន់ប្រតិបត្តិ ការសឹករង បាត់ដំបង ជា អនុប្រធាន សមាគមអតីតយុទ្ធជនកម្ពុជាខេត្ត នាថ្ងៃទី២១ ខែសីហា ឆ្នាំ២០២២ បានដឹកនាំកម្លាំងចុះសំណេះសំណាល សាកសួរសុខទុក្ខលោក ឧត្តមសេនីយ៍ត្រី គឹម សែន អតីតមេបញ្ជាការរង ជាសមាជិក សមាគមអតីតយុទ្ធជនកម្ពុជាខេត្តបាត់ដំបង ដែលកំពុងមានជំងឺសម្រាកព្យាបាលនៅផ្ទះស្ថិតនៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង។
ក្នុងឱកាសនោះដែរលោកមេបញ្ជាការរង នាយ សេនាធិការ បាននាំយកថវិកាដែលបានមកពីការជួយឧបត្ថម្ភរបស់លោកមេបញ្ជាការ មេបញ្ជាការរង នាយទាហាន-ពលទាហាន តំបន់ប្រតិបត្តិការសឹករងបាត់ដំបង ផ្តល់ជូនចំនួន ២,៨០៥,០០០រៀល ឯកឧត្តម ហ៊ុន ម៉ាណែ ត និង លោកជំទាវ ពេជ ចន្ទមុន្នី បានឧបត្ថម្ភ អង្ករ និងគ្រឿងឧបភោគបរិភោគមួយចំនួនទៀតផងដែរ។
លោកមេបញ្ជាការរង នាយ សេនាធិការ បានពាំនាំការផ្តាំផ្ញើសួរសុខទុក្ខពីលោកមេបញ្ជាការ និងថ្នាក់ដឹកនាំគ្រប់លំដាប់ថ្នាក់ ហើយលោកក៏បានថ្លែងអំណរគុណយ៉ាងជ្រាលជ្រៅចំពោះនាយទាហាន នាយទាហានរង និងពលទាហានទាំងអស់ សូមឲ្យបន្តនូវវប្បធម៌ ចែករំលែកជួយគ្នាទៅវិញទៅមក នេះបង្ហាញឲ្យឃើញនូវសាមគ្គីភាពដ៏រឹងមាំក្នុងជួរកងកម្លាំង ហើយលោកមេបញ្ជាការរង នាយ សេនាធិការ បានជូនពរដល់អតីតយុទ្ធជនដែលកំពុងសម្រាកព្យាបាលជំងឺនៅពេលនេះ សូមឆាប់ជាសះស្បើយ និងមានសុខភាពល្អប្រសើរឡើងវិញ ៕
