អតីតយុទ្ធជនពិការ និងគ្រួសារប្រជាពលរដ្ឋ ក្រីក្រ នៅឃុំត្រពាំងឫស្សី ស្រុកកំពង់ស្វាយ ខេត្តខេត្តកំពង់ធំ បានទទួលអំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ នៅថ្ងៃទី១៨ខែ សីហា ឆ្នាំ២០២២ បានដឹកនាំសហការីរួមជានិងអាជ្ញាធរដែន បន្តនាំយកអំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ទៅឧបត្តម្ភ អតីតយុទ្ធជនពិការនិងគ្រួសារប្រជាពលរដ្ឋ ដែលមានជីវភាពលំបាកខ្វះខាតចំនួន១២គ្រួសារ រស់នៅភូមិវល្លិ៍យាវឃុំត្រពាំងឫស្សី ស្រុកកំពង់ស្វាយខេត្តកំពង់ធំ ។
ឧត្ដមសេនីយ៍ទោ សោម ស៊ុន បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជានិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់បងប្អូនអតីតយុទ្ធជន និងប្រជាពលរដ្ឋដែលមានជីវភាពលំបាកខ្វះខាត ដែលសម្តេចតែងតែគិតគូរយកចិត្តទុកដាក់ ដោះស្រាយដល់ជីវភាពរស់នៅរបស់បងប្អូនអតីតយុទ្ធជននិងប្រជាពលរដ្ឋ ដែលជួបការខ្វះខាតគ្រប់ពេលវេលា និងគ្រប់ទីកន្លែង ។
ឧត្តមសេនីយ៍ទោ សោម ស៊ុន បានសំណូមពរដល់ក្រុមគ្រួសារអតីតយុទ្ធជននិងប្រជាពលរដ្ឋទាំងអស់ ត្រូវខិតខំថែរក្សា សុខភាពប្រកបមុខរបររកទទួលទានដោយសុច្ចរិតទៀងត្រង់ ចូលរួមជាមួយអាជ្ញាធរដែនដី ដើម្បីអនុវត្តនូវគោលនយោបាយភូមិ ឃុំ មានសុវត្ថិភាពនៅក្នុងមូលដ្ឋាន នឹងត្រូវបន្តខិតខំការពារទប់ស្កាត់ ការឆ្លងជំងឺកូវីដ-១៩ ដោយអនុវត្តឲ្យបានខ្ជាប់ខ្ជួននូវវិធានការបីការពារ បីកុំ របស់សម្តេចតេជោ ហ៊ុន សែន ព្រមទាំងអញ្ជើញទៅចាក់វ៉ាក់សាំងដែលជាដូសជំរុញ ឲ្យបានគ្រប់ៗគ្នា ។
ឧត្តមសេនីយ៍ទោ សោម ស៊ុន បានបញ្ជាក់ថា អំណោយដែលបានឧបត្ថម្ភ ជូនបងប្អូនអតីតយុទ្ធជននិងប្រជាពលរដ្ឋដែលមានជីវភាពលំបាកខ្វះខាតទាំង១២គ្រួសារ នៅពេលនេះ ជាអំណោយរបស់ឯកឧត្តមបណ្ឌិត ហ៊ុន ម៉ាណែតនិងលោកជំទាវ ដោយក្នុង១គ្រួសារទទួលបានអង្ករចំនួន២៥គីឡូក្រាម មីជាតិចំនួន១កេស និងត្រីខកំប៉ុង១យួរ ផងដែរ។ ព្រមជាមួយនោះលោកយាយ បូ កន អាយុ៦៦ឆ្នាំ មានកូនក្នុងបន្ទុកចំនួន៦នាក់ ដោយដំបូលខ្ទមផ្ទះរបស់គាត់មានសភាពធ្លុះធ្លាយ និងបានផ្តល់ជូនស័ង្កសីចំនួន១០សន្លឹក ដើម្បីធ្វើការជួសជុលជម្រកស្នាក់នៅជូនគាត់ផងដែរ។
អាជ្ញាធរដែនដី ក្រុមគ្រួសារអតីតយុទ្ធជននិងប្រជាពលរដ្ឋ សូមគោរពថ្លែងអំណរគុណចំពោះសម្តេចតេជោ និងសម្តេចកិត្តិព្រឹទ្ធបណ្ឌិត រួមទាំងក្រុមការងារ គណៈកម្មការសមាគមអតីតយុទ្ធជនខេត្តកំពង់ធំទាំងអស់ ដែលបានយកចិត្តទុកដាក់ដោះស្រាយការលំបាក បានទាន់ពេលវេលា និងសូមគោរពជូនពរ សម្តេច ឯកឧត្តម លោកជំទាវ លោក លោកស្រី ទាំងអស់ សូមបានទទួលនូវពុទ្ធពរទាំងឡាយ៥ប្រការ កុំបីឃ្លៀងឃ្លាតឡើយ ៕
