អភិបាលខេត្តបន្ទាយមានជ័យ ណែនាំក្រុមការងារលេខាធិការដ្ឋានក្រុង-ស្រុក ត្រូវធ្វើបច្ចុប្បន្នភាពអតីតយុទ្ធជន និងនិវត្តជន
បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្ត បានណែនាំទៅដល់ក្រុមការងារលេខាធិការដ្ឋានក្រុង-ស្រុក ទាំងអស់ ត្រូវធ្វើបច្ចុប្បន្នភាពអតីតយុទ្ធជន និងនិវត្តជន ដោយត្រូវការបែងចែកឱ្យបានច្បាស់លាស់រវាងអតីតយុទ្ធជន និងនិវត្តជន។
ឯកឧត្តម អ៊ុំ រាត្រី ណែនាំបែបនេះក្នុងពិធីប្រកាសសមាសភាពក្រុមការងារជំនាញ របស់លេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តបន្ទាយមានជ័យ។ ពិធីនេះប្រព្រឹត្តទៅនៅទីស្នាក់ការអតីតិយុទ្ធជន និងនិវត្តជនកម្ពុជាខេត្ត ស្ថិតនៅភូមិពង្រ សង្កាត់កំពង់ស្វាយ ក្រុសិរីសោភ័ណ ខេត្តបន្ទាយមានជ័យ នារសៀលថ្ងៃទី១ ខែកក្កដា ឆ្នាំ២០២៦។
នាឱកាសនោះឯកឧត្តម អ៊ុំ រាត្រី បានណែនាំទៅដល់ក្រុមការងារលេខាធិការដ្ឋានក្រុង-ស្រុកទាំងអស់ ត្រូវរួមសហការគ្នាជាមួយនិងមូលដ្ឋាន ក្នុងការស្រង់ស្ថិតិទិន្នន័យ ធ្វើបច្ចុប្បន្នភាពអតីតយុទ្ធជន និងនិវត្តជននៅក្នុងមូលដ្ឋានរបស់ខ្លួនដោយត្រូវការបែងចែកឱ្យបានច្បាស់លាស់រវាងអតីតយុទ្ធជន និងនិវត្តជន ដើម្បីធ្វើរបាយការណ៍មក លេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្ត ធ្វើការស្រង់ទិន្ន័យ ត្រួតពិនិត្យ និងវាយតម្លៃ។ជាពិសេសរាល់ការដាក់ពាក្យស្នើសុំរបស់អតីតយុទ្ធជន និងនិវត្តជន ត្រូវធ្វើការធ្វើការត្រួតពិនិត្យវាយតម្លៃលើពាក្យស្នើសុំ និងចុះពិនិត្យជាក់ស្តែងថា តើពួកគាត់ត្រឹមតាមលក្ខខណ្ឌដែរឬអត់ បើពួកគាត់ពិតជាមានជីវភាពលំបាកពិតប្រាកដមែន ក្រុមការងារនឹងធ្វើការផ្តល់ជូនតាមពាក្យស្នើសុំ។
សូមបញ្ជាក់ថា សមាគមអតីតយុទ្ធជន និងនិវត្តជនកម្ពុជា ខេត្តបន្ទាយមានជ័យ ត្រូវបានប្រកាសជាផ្លូវការ នាថ្ងៃទី១៥ ខែវិច្ឆិកា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ កិត្តិសង្គហបណ្ឌិតគន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ អ.ន.ក។ ជាមួយគ្នានោះ សមាគមអតីតយុទ្ធជន និងនិវត្តជនកម្ពុជាក្រុង-ស្រុក ក៏ត្រូវបានប្រកាសជាផ្លូវការនាថ្ងៃទី១២ ខែឧសភា ឆ្នាំ២០២៦៕
