ឯកឧត្តម វង សូត៖ កត្តាសុខសន្តិភាពបាននាំមកការអភិវឌ្ឍ ប្រទេសជាតិជាបន្តបន្ទាប់
ភ្នំពេញ៖ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា មិនថាវិស័យពុទ្ធចក្រ និងអាណាចក្រ ដូច្នោះយើងរួមគ្នាថែរក្សាអ្វីដែលមាន និងបន្តការអភិវឌ្ឍន៍ជារាជរដ្ឋាភិបាល កម្ពុជាបច្ចប្បន្នបន្តទៀត។
ការថ្លែងបែបនេះរបស់ ឯកឧត្តម វង សូត ធ្វើលើងក្នុងពិធីប្រគេនទៀនព្រះវស្សា និងសំណេះសំណាលជាមួយ លោកយាយលោកតា នៅក្នុងវត្តថ្កូវ ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ។
ឯកឧត្តម វង សូត បានពាំនាំប្រសាសន៍ផ្តាំផ្ញើសួសុខទុក្ខរបស់សម្តេចតេជោ ហ៊ុន សែន និង សម្តេចពញាចក្រី ហេង សំរិន និងថ្លែងអំណរគុណដល់លោកយាយលោកតា បងប្អូនប្រជាពលរដ្ឋដែលបានគាំទ្រចំពោះការដឹកនាំ របស់គណបក្សប្រជាជនកម្ពុជាកន្លងមករហូតដល់បច្ចប្បន្ន ពោលគឺមានតែគណបក្សប្រជាជនកម្ពុជា ទេដែលនាំសុខសន្តិភាពមកនូវជូនយើងទាំងអស់គ្នា។
ឯកឧត្ដមបញ្ជាក់ថា “កត្តាសុខសន្តិភាពនេះហើយដែលបានធ្វើប្រជាជនមានសិទ្ធិដើរហើរពេញលេង អាចជួបជុំគ្នាដូចពេលនេះ ធ្វើបុណ្យរួមគ្នា កសាងអភិវឌ្ឍន៍ប្រទេសជាតិឲ្យកាន់តែជឿនលឿនទៀត”។
ឯកឧត្ដម វង សូត បានសង្កត់ធ្ងន់ទៀតថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានគិតគូរសុខទុក្ខបងប្អូនប្រជាពលរដ្ឋគ្រប់កាលៈទេសៈ ដូចពេលនេះបានស្វះស្វែងរកវ៉ាក់សាំងមកចាក់ ជូនពលរដ្ឋខ្លួនដោយឥតគិតថ្លៃទៀត ពីដូសទី១ ដូសទី២ ទី៣ ទី៤ និងដូសជំរុញដូសទី៥ទៀត ដើម្បីប្រឆាំងការត្បាតជម្ងឺកូវីដ១៩៕
