លោក ដូណាល់ ត្រាំ មានសុវត្ថិភាព ខណៈជនសង្ស័យម្នាក់ត្រូវបានចាប់ខ្លួន បន្ទាប់ពីជម្លៀសចេញពីពិធីជប់លៀងជាមួយក្រុមអ្នកកាសែតដែលស្នូរគ្រាប់កាំភ្លើងបានផ្ទុះឡើង

វ៉ាស៊ីនតោន៖ តាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ នៅថ្ងៃសៅរ៍ ទី២៥ ខែមេសា ឆ្នាំ២០២៦ (ម៉ោងនៅសហរដ្ឋអាមេរិក) បានឱ្យដឹងថារូបលោក និងគណៈរដ្ឋមន្ត្រីរបស់លោក មានសុវត្ថិភាព ហើយជនសង្ស័យម្នាក់ត្រូវបានចាប់ខ្លួន បន្ទាប់ពីត្រូវបានជម្លៀសចេញពីពិធីជប់លៀងជាមួយក្រុមអ្នកកាសែតនៅឯសណ្ឋាគារ Washington Hilton ជាទីដែលស្នូរគ្រាប់កាំភ្លើងបានផ្ទុះឡើង។

ក្នុងការបង្ហោះមួយលើបណ្ដាញទំនាក់ទំនងសង្គម Truth Social លោក ត្រាំ ក៏បានឱ្យដឹងដែរថារូបលោកនឹងធ្វើសន្និសីទសារព័ត៌មានចេញពីសេតវិមាន។

«ជំទាវទី១ ព្រមទាំងលោកអនុប្រធានាធិបតី និងសមាជិកគណៈរដ្ឋមន្ត្រីទាំងអស់មានសុវត្ថិភាព។ យើងនឹងធ្វើសន្និសីទសារព័ត៌មានក្នុងពេល៣០នាទីទៀតនេះ»។ នេះជាការគូសបញ្ជាក់របស់លោក ត្រាំ ក្នុងសារមួយបង្ហោះលើ Truth Social។

លោក ត្រាំ ក៏បានកោតសរសើរផងដែរចំពោះកងអង្គរក្សសម្ងាត់ Secret Service និងមន្ត្រីអនុវត្តច្បាប់នៅមូលដ្ឋានដែលបានធ្វើសកម្មភាពទាន់ពេលវេលា និងក្លាហានបំផុត។ តាមលោក ត្រាំ ជនសង្ស័យជាខ្មាន់កាំភ្លើងម្នាក់ត្រូវបានចាប់ខ្លួន។

គួរបញ្ជាក់ថា វីដេអូពីកន្លែងកើតហេតុបានបង្ហាញថាលោក ត្រាំ និងអ្នកចូលរួមផ្សេងទៀតបានឱនចុះនៅក្រោមតុ ក្រោយឮសូរសំឡេងគ្រាប់កាំភ្លើង ខណៈមនុស្សម្នានាំគ្នាស្រែក ក្រាបចុះ ក្រាបចុះ។ ភ្លាមៗនេះ កងអង្គរក្ស Secret Service បានជម្លៀសលោក ត្រាំ ចេញពីពិធីជប់លៀងដោយសុវត្ថិភាព៕