កំពង់ចាម៖ នាព្រឹកថ្ងៃទី១៧ ខែមីនា ឆ្នាំ២០២៦ នៅវិទ្យាល័យកោះសូទិន ស្រុកកោះសូទិន ខេត្តកំពង់ចាម ឯកឧត្តម កូប រ៉លី អនុរដ្ឋលេខាធិការក្រសួងបរិស្ថាន និងលោក គន់ សុភា អភិបាលរងខេត្តកំពង់ចាម បានអញ្ជេីញជាគណ:អធិបតីក្នុងយុទ្ធនាការផ្សព្វផ្សាយ ស្តីពីការទប់ស្កាត់ការបំពុលដោយប្លាស្ទិកសម្រាប់សហគមន៍ និងទន្លេមេគង្គនៅកម្ពុជា គាំទ្រដោយមូលនិធិពិសេសសហប្រតិបត្តិការមេគង្គ-ឡានឆាង និងដោយមានការចូលរួមដោយថ្នាក់ដឹកនាំ មន្ត្រីក្រសួងបរិស្ថាន មន្ទីរបរិស្ថានខេត្តកំពង់ចាម តំណាងរដ្ឋបាលស្រុកកំពង់ចាម តំណាងរដ្ឋបាលស្រុកកំពង់សៀម តំណាងរដ្ឋបាលស្រុកកោះសូទិន តំណាងរដ្ឋបាលក្រុងកំពង់ចាម តំណាងឃុំសង្កាត់ នៃស្រុកកោះសូទិន និងក្រុងកំពង់ចាម រួមទាំងលោកគ្រូ អ្នកគ្រូ យុវជនកាយរឹទ្ធិ យុវជនកាកបាទក្រហម យុវជនស.ស.យ.ក សិស្សានុសិស្សវិទ្យាល័យកោះសូទិន និងក្រុមហ៊ុនប្រមូលសំរាម សរុបប្រមាណ៣០០រូប។
យុទ្ធនាការនេះបានរៀបចំឡើងក្រោមការគាំទ្រពីមូលនិធិពិសេសមេគង្គ-ឡានឆាង តាមរយៈស្ថានទូតចិនប្រចាំកម្ពុជា និងសម្របសម្រួលមូលនិធិពីក្រសួងការបរទេស និងកិច្ចសហប្រតិបត្តិការអន្តរជាតិនៃព្រះរាជាណាចក្រកម្ពុជា។
ឯកឧត្តម កូប រ៉លី អនុរដ្ឋលេខាធិការបានមានប្រសាសន៍បើក ដោយសង្កត់ធ្ងន់លើសារៈសំខាន់ និងសារសំខាន់ៗរបស់ក្រសួងបរិស្ថានដោយផ្អែកលើយុទ្ធសាស្រ្តចក្រាវិស័យបរិស្ថាន ២០២៣-២០២៨ ក្រោមការដឹកនាំ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន សម្រាប់ការចូលរួមយ៉ាងសកម្មពីមន្រ្តីរាជការ និងប្រជាជនគ្រប់ស្រទាប់ចូលរួមលើកកម្ពស់ និងប្រែក្លាយបរិស្ថានកម្ពុជាឱ្យកាន់តែល្អប្រសើរស្របតាមស្នូលយុទ្ធសាស្ត្រចំនួន ៣ គឺ ១-ភាពស្អាត ២-ភាពបៃតង និង ៣-ចីរភាព។
ឯកឧត្តមក៏បានលើកពីផលប៉ះពាល់ប្លាស្ទិកចំពោះបរិស្ថាន ជាពិសេសផលប៉ះពាល់សុខភាពដែលកើតចេញប្លាស្ទិក និងបានផ្តល់សារអប់រំលើកកម្ពស់ការយល់ដឹងរបស់អ្នកចូលរួម និងកាត់បន្ថយការប្រើប្រាស់ ការបដិសេធ ការញែកសំណល់ប្លាស្ទិក ការប្រមូលសម្រាប់កែច្នៃប្លាស្ទិក ការប្រើប្រាស់ឡើងវិញ និងការបង្កើតជម្រើសប្លាស្ទិក ដើម្បីសហគមន៍៕
