សាខាកាកបាទក្រហមកម្ពុជាខេត្តសៀមរាប បាននាំយកអំណោយផ្តល់ភ្នាក់ងារទូរទ័ស្ទបាយយ័ន ដែលមានជំងឺសម្ពាធសរសៃឈាម កំពុងសំរាកព្យាបាលនៅផ្ទះ ដើម្បីជាការលើកទឹកចិតពីសំណក់ថ្នឹកនាំ ចំពោះកូនចៅដែលមានទុក្ខលំបាក។
ដោយទទួលបានព័ត៌មានពីបណ្តាញសង្គម ស្តីពីក្រុមគ្រួសារលោក ងឹន គឹមឡេង ជាភ្នាក់ងារទូរទស្សន៍បាយ័ន ជួបនូវការខ្វះខាត ក្នុងការព្យាបាលជម្ងឺ ដោយលោក ងឹន គឹមឡេង មានជម្ងឺសម្ពាធសរសៃឈាម ធ្វើឲ្យស្លាប់មួយចំហៀងខ្លួន កំពុងសម្រាកព្យាបាលនៅនឹងផ្ទះ ។ នៅព្រឹកថ្ងៃទី ០៦ ខែ កក្កដា ឆ្នាំ២០២២នេះ ត្រូវបានលោក ស៊ុ សំអន នាយកប្រតិបត្តិសាខាកាកបាទក្រហមខេត្ត នាំយកអំណោយជាគ្រឿងឧបភោគបរិភោគ និង ថវិកា ទៅប្រគល់ជូនដល់លំនៅដ្ឋាន ស្ថិតនៅភូមិត្រពាំងសេះ សង្កាត់គោកចក ក្រុង ខេត្តសៀមរាប ។
មានប្រសាសន៍នាឱកាសនោះ លោក ស៊ុ សំអន បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ លោកក៏បានផ្ដាំផ្ញើ និងលើកទឹកចិត្តចំពោះលោក ងឹន គឹមឡេង និងក្រុមគ្រួសារសូមបន្តថែរក្សាសុខភាព និង អនុវត្តន៍តាមការណែនាំរបស់គ្រូពេទ្យ ដើម្បីឆាប់បានធូរស្រាលឡើងវិញ ។ លោកបានបន្តថា ថ្វីត្បិតតែអំណោយមនុស្សធម៌ដែលបាននាំយកមកជូននាពេលនេះ មានចំនួនតិចតួចក្ដី តែក៏អាចជួយសម្រាលទុក្ខលំបាករបបានមួយកម្រិត ហើយក៏ជាការបង្ហាញនូវការយកចិត្តទុកដាក់ពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល ” និង “ ទីណាមានទុក្ខលំបាក ទីនោះមានកាកបាទក្រហមកម្ពុជា” ។
សូមបញ្ជាក់ថា លោក ងឹន គឹមឡេង ជាភ្នាក់ងារ និងជាអ្នកសារព័ត៌មានសា្ថនីយទូរទស្សន៍បាយ័ន ប្រចាំខេត្តសៀមរាប ដែលលោកបានសហការ និងសម្របសម្រួលផ្សព្វផ្សាយអំពីសកម្មភាពមនុស្សធម៌របស់សាខាកាកបាទក្រហមកម្ពុជា ខេត្តសៀមរាប និងការងារសង្គម តាំងពីឆ្នាំ១៩៩២មកម៉្លះ ។ ក្នុងកំឡុងខែមេសា ឆ្នាំ២០២២ លោកមានជម្ងឺសម្ពាធសរសៃឈាមបណ្ដាឲ្យស្លាប់មួយចំហៀងខ្លួន ហើយស្ថានភាពជីវភាពគ្រួសារក៏ជួបលំបាកខ្លាំងទៀតផង ។
អំណោយមនុស្សធម៌បានផ្ដល់ជូនមាន៖ មុង១ ភួយ១ សារុង១ ក្រមា១ អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ី១យួរ ទឹកបរិសុទ្ធចំណុះ១,៥លីត្រ ២យួរ និងថវិកា៤សែនរៀល៕
