លោក Elon Musk ម្ចាស់ SpaceX និង លោក Jeff Bezos ម្ចាស់ Blue Origin កំពុងប្រឹងប្រែងទៅដល់ឋានព្រះច័ន្ទ ធ្វើយ៉ាងណាឲ្យបានមុនផែនការរបស់ប្រទេសចិន ដែលគ្រោងបេសកកម្មឆ្នាំ២០៣០

បរទេស៖ បើតាមការចេញផ្សាយដោយសារព័ត៌មាន Reuters នៅថ្ងៃទី១៤ ខែកុម្ភៈ ឆ្នាំ២០២៦ ការប្រកួតប្រជែងវិស័យអវកាសរវាងមហាសេដ្ឋីអាមេរិកកំពុងឡើងកម្តៅ ខណៈ Elon Musk ម្ចាស់ SpaceX និង លោក Jeff Bezos ម្ចាស់ Blue Origin កំពុងប្រឹងប្រែងទៅដល់ឋានព្រះច័ន្ទ ធ្វើយ៉ាងណាឲ្យបានមុនផែនការរបស់ប្រទេសចិន ដែលគ្រោងបេសកកម្មឆ្នាំ២០៣០។

តាមសេចក្តីរាយការណ៍ពី Reuters បានឲ្យដឹងថា ការប្រកួតនេះពាក់ព័ន្ធយ៉ាងជិតស្និទ្ធនឹងកម្មវិធី NASA Artemis និងសម្ពាធភូមិសាស្ត្រនយោបាយ ដើម្បីរក្សាភាពជាអ្នកដឹកនាំអវកាសរបស់សហរដ្ឋអាមេរិក។ Elon Musk បានប្រកាសថា ក្រុមហ៊ុន SpaceX កំពុងផ្លាស់ប្តូរអាទិភាពពីគម្រោងទៅភពអង្គារ មកផ្តោតលើឋានព្រះច័ន្ទ ជាដំណាក់កាលលឿនជាងក្នុងការពង្រីកអរិយធម៌មនុស្ស។

ក្រុមហ៊ុនមានគម្រោងសាងសង់មូលដ្ឋានមួយឈ្មោះ «Moonbase Alpha» និងគិតថានឹងបង្កើត «ទីក្រុងដែលអាចរីកចម្រើនដោយខ្លួនឯង» លើឋានព្រះច័ន្ទក្នុងរយៈពេលប្រហែលមួយទសវត្សរ៍។ SpaceX កំណត់គោលដៅបេសកកម្មមិនមានមនុស្សនៅឆ្នាំ២០២៧ និងបេសកកម្មមានមនុស្សប្រហែលឆ្នាំ២០២៨ ដោយប្រើយាន Starship ទោះបីជាកំពុងស្ថិតក្នុងដំណាក់កាលសាកល្បងក៏ដោយ។

ងាកមកផ្នែករបស់លោក Jeff Bezos គឺក្រុមហ៊ុនអវកាស Blue Origin វិញ ក៏កំពុងកាត់បន្ថយសកម្មភាពទេសចរណ៍អវកាស ដើម្បីផ្តោតធនធានទៅលើគម្រោងឋានព្រះច័ន្ទផងដែរ។ ក្រុមហ៊ុនកំពុងអភិវឌ្ឍយានចុះចត «Blue Moon» ហើយគ្រោងបាញ់បេសកកម្មមិនមានមនុស្សក្នុងឆ្នាំ២០២៦នេះ។ ឧបករណ៍សំខាន់ៗត្រូវបានបញ្ជូនទៅមជ្ឈមណ្ឌលអវកាស Johnson របស់ NASA សម្រាប់ការធ្វើតេស្តរួចហើយ។

ចិនជាហេតុជំរុញសំខាន់ការប្រកួតប្រជែងកាន់តែតានតឹង ព្រោះចិនកំពុងរៀបចំបេសកកម្មនាំអវកាសយានិកចុះលើឋានព្រះច័ន្ទនៅឆ្នាំ២០៣០។ អ្នកជំនាញឧស្សាហកម្មជឿថា ការប្រកួតរវាង SpaceX និង Blue Origin កំពុងជួយលើកល្បឿននវានុវត្តន៍អវកាសរបស់សហរដ្ឋអាមេរិក។

បច្ចុប្បន្ន SpaceX ត្រូវបានមើលឃើញថា មានអត្ថប្រយោជន៍ផ្នែកបច្ចេកវិទ្យា និងបទពិសោធន៍ហោះហើរច្រើនជាង ខណៈ Blue Origin មានវិធីសាស្ត្រអភិវឌ្ឍយ៉ាងប្រុងប្រយ័ត្ន និងផ្តោតលើយានចុះចតជាក់លាក់៕