ឯកឧត្ដម លី ធុជ អញ្ជើញទស្សនកិច្ចស្វែងយល់សកម្មភាពហ្វឹកហ្វឺនការងារបោសសម្អាតមីន និងសុនខរាវមីន នៅវិទ្យាស្ថានបច្ចេកទេសសកម្មភាពមីនស៊ីម៉ាក់ ក្នុងខេត្តកំពង់ឆ្នាំង

ភ្នំពេញ៖ អាជ្ញាធរមីន រួមសហការជាមួយ ស្ថានទូតឥណ្ឌាប្រចាំនៅកម្ពុជា, មូលនិធិ Sir Bobby Charlton, មូលនិធិ Prince និងសភាពាណិជ្ចកម្មអាមេរិកប្រចាំនៅកម្ពុជា ឯកឧត្ដម លី ធុជ នៅថ្ងៃទី០៥ ខែកក្កដា ឆ្នាំ២០២២ បាន ដឹកនាំ គណៈប្រតិភទស្សនកិច្ចស្វែងយល់អំពីសកម្មភាពហ្វឹកហ្វឺនការងារបោសសម្អាតមីន និងសុនខរាវមីន នៅវិទ្យាស្ថានបច្ចេកទេសសកម្មភាពមីនរបស់ស៊ីម៉ាក់ ក្នុងខេត្តកំពង់ឆ្នាំង ។ ដំណើរ ទស្សនកិច្ច នេះ ប្រព្រឹត្តិ ទៅ ក្រោម កម្មវិធី “ឥទ្ធិពលស្រ្តីក្នុងវិស័យសកម្មភាពមីន”។

ក្នុងដំណើរទស្សន កិច្ច នេះ ឯកឧត្ដម លី ធុជ ថ្លែងអំណរចំពោះកិច្ចទទួលស្វាគមន៍យ៉ាងកក់ក្តៅពី លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) និងសហការី ព្រមទាំងបានវាយតម្លៃខ្ពស់សកម្មភាពហ្វឹកហ្វឺន សមត្ថភាព ជំនាញ និងបច្ចេកទេសរបស់អ្នកដោះមីន ដែលទទួលបានមកពីវិទ្យាស្ថាននេះ។

ស៊ីម៉ាក់ គឺជាមជ្ឈមណ្ឌលបោសសម្អាតមីនជាតិដ៏លេចធ្លោមួយ និងមានសមត្ថភាពខ្ពស់ ព្រមទាំងបានចូលរួមរំដោះផ្ទៃដីពីការគម្រាមកំហែងដោយសារមីន និងសំណល់ជាតិផ្ទុះពីសង្រ្គាមច្រើនជាងគេនៅកម្ពុជា។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី តែងតែយកចិត្តទុកដាក់ខ្ពស់ដល់សុវត្ថិភាព និងត្រូវបោសសម្អាតមីនឲ្យអស់ពីកម្ពុជា ដើម្បីផ្តល់នូវស្នាមញញឹមជូនប្រជាពលរដ្ឋ។

ថ្មីៗនេះសម្តេចតេជោ បានផ្តល់បេសកកម្មឲ្យអាជ្ញាធរមីន ដឹកនាំ និងរៀបចំវិស័យសកម្មភាពមីនជាមួយប្រតិបត្តិករជាតិ ដើម្បីរៀបចំផែនការ និងដាក់ពង្រាយកម្លាំងបោសសម្អាតមីន ក្រោម “គម្រោងសម្តេចតេជោសម្រាប់សកម្មភាពមីន” ដំណាក់កាលដំបូង ក្នុងនោះត្រូវការជាចំបាច់នូវកម្លាំងមជ្ឈមណ្ឌលសកម្មភាពកំចាត់មីនកម្ពុជា ចូលរួមផងដែរ ដែលត្រូវអនុវត្តតាមស្តង់់ដាសកម្មភាពកំចាត់មីនកម្ពុជា៕