លោកឧត្តមសេនីយ៍ទោ សិទ្ធិ ឡោះ បញ្ជូនកម្លាំងនគរបាលជាង១០០នាក់ រថយន្តទឹក១១គ្រឿង ចុះជួយពន្លត់ករណីអគ្គីភ័យឆាបឆេះផ្ទះប្រជាពលរដ្ឋនៅក្រុងប៉ោយប៉ែត

បន្ទាយមានជ័យ៖ កាលពីវេលាម៉ោង ២១:២០នាទីយប់ ថ្ងៃទី០៤ ខែកុម្ភះ ឆ្នាំ២០២៦ មានករណីអគ្គីភ័យមួយបានឆាបឆេះផ្ទះសំណាក់យីហោ ខេមរា និងទីតាំងលក់សំបុត្ររថយន្តក្រុងដឹកអ្នកដំណើរយីហោ កាពីតូល នៅតាមផ្លូវជាតិលេខ ៥ស្ថិតនៅភូមិអូរជ្រៅ សង្កាត់អូជ្រៅ ក្រុងប៉ោយប៉ែត ខេត្តបន្ទាយមានជ័យ។

ភ្លាមៗនោះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានចាត់តាំងលោកឧត្តមសេនីយ៍ត្រី រ៉ែម វីរ: ស្នងការរង ការងារសេនាធិការ បានដឹកនាំកម្លាំងនគរបាលជំនាញ ពន្លត់អគ្គីភ័យ និងកម្លាំងនគរបាលតាមបណ្តាក្រុង/ស្រុក រួមមានកម្លាំងអធិការដ្ឋាននគរបាលក្រុងប៉ោយប៉ែត ក្រុងសិរីសោភ័ណ ស្រុកអូរជ្រៅ ស្រុកមង្គលបូរី កម្លាំងវរសេនាតូចនគរបាលការពារព្រំដែនតូចលេខ៩១១,៨៩១ នាំយករថយន្តទឹក ចំនួន១១គ្រឿង កម្លាំងសរុប១៥០នាក់ សហការជាមួយអាជ្ញាធរមូលដ្ឋាន សមត្ថកិច្ចពាក់ព័ន្ធ ក្រុមពន្លត់អគ្គីភ័យមកពីបណ្តាក្រុមហ៊ុនកាស៊ីណូ ចុះជួយអន្តរាគមន៍ពន្លត់ទីតាំងកើតហេតុ។

ប្រតិបត្តិការជួយពន្លត់អគ្គីភ័យនេះ នគរបាលយើងបានប្រើប្រាស់រថយន្តដឹកទឹកចំនួន១១គ្រឿង ទឹកចំនួន១៩ធុង រហូតដល់ម៉ោង១១យប់ទើប ភ្លើងបានរលត់ទាំងស្រុង និងគ្រប់គ្រងបាន១០០ភាគរយ មិនឆេះរាលដល់ទៅកន្លែងដ៏ទៃទៀត។ ហេតុការនេះមិនបានបណ្តាលឲ្យបានជនណាម្នាក់ស្លាប់បាត់បង់ជីវិតទេ មានតែពលរដ្ឋម្នាក់រងរបួសស្រាលត្រូវបានបញ្ជូនទៅសង្គ្រោះភ្លាមៗ។ ផ្ទះចំនួន២ទីតាំង ដែលមួយទីតាំងមានទំហំ ៨៨ម៉ែត្រx៣០ម៉ែត្រ ត្រូវបានភ្លើងឆេះទាំងស្រុង៕