ករណីអ្នកជំងឺ២នាក់ឆ្លងវីរុសនីប៉ាហ៍ (Nipah) នៅក្នុងប្រទេសឥណ្ឌា បានជំរុញឱ្យអាជ្ញាធរក្នុងប្រទេសថៃ សិង្ហបុរី ហុងកុង និងម៉ាឡេស៊ី បង្កើនការត្រួតពិនិត្យនៅតាមអាកាសយានដ្ឋាន
បរទេស៖ ករណីអ្នកជំងឺ២នាក់ឆ្លងវីរុសនីប៉ាហ៍ (Nipah) នៅក្នុងប្រទេសឥណ្ឌា បានជំរុញឱ្យអាជ្ញាធរក្នុងប្រទេសថៃ សិង្ហបុរី ហុងកុង និងម៉ាឡេស៊ី បង្កើនការត្រួតពិនិត្យនៅតាមអាកាសយានដ្ឋាន ក្រោមកិច្ចប្រឹងប្រែងបង្ការកុំឱ្យផ្ទុះករណីឆ្លងរាលដាលនៅក្នុងប្រទេសរបស់ពួកគេ។
វីរុសនីប៉ាហ៍អាចបង្កឱ្យមានអាការៈគ្រុនក្ដៅ និងបង្កផលប៉ះពាល់ដល់ប្រព័ន្ធប្រសាទ ហើយអ្នកដែលឆ្លងវីរុសនេះ អាចប្រឈមនឹងអត្រាស្លាប់ចន្លោះពី៤០ ដល់៧៥ភាគរយ។ ដូច្នេះជាវិធានការបង្ការ អាជ្ញាធរនៅក្នុងប្រទេសថៃ សិង្ហបុរី ហុងកុង និងម៉ាឡេស៊ី បាននិងកំពុងបង្កើនការត្រួតពិនិត្យនៅតាម អាកាសយានដ្ឋាន ជាពិសេសគឺការត្រួតពិនិត្យលើអ្នកដំណើរដែលធ្វើដំណើរមកពីតំបន់ដែល កំពុងមានករណីឆ្លងវីរុសនីប៉ាហ៍ក្នុងប្រទេសឥណ្ឌា។
គួរបញ្ជាក់ថា វីរុសនីប៉ាហ៍ គឺជាជំងឺបង្កឡើងដោយវីរុសដ៏ធ្ងន់ធ្ងរ ហើយអាចបណ្តាលឲ្យស្លាប់បាន។ វីរុសនីប៉ាហ៍ រីករាលដាលដោយផ្ទុកលើសត្វប្រចៀវ និងសត្វជ្រឹង និងអាចឆ្លងមកមនុស្ស និងជ្រូក។ វាអាចឆ្លងពីមនុស្សម្នាក់ទៅមនុស្សម្នាក់ទៀតតាមរយៈការប៉ះពាល់ផ្ទាល់តាមរយៈទឹក សរីរាង្គមនុស្ស។ អ្នកដែលមានជំងឺនីប៉ាហ៍ ជាធម្មតាឈឺរយៈពេល ៣ទៅ ១៤ថ្ងៃដោយមានគ្រុនក្តៅ ឈឺក្បាល ក្អក ឈឺបំពង់ក និងពិបាកដកដង្ហើម។
ក្រោយការឆ្លងមេរោគ មនុស្សមួយចំនួនអាចជួបប្រទះនឹង ការហើមខួរក្បាល ឬរលាកខួរក្បាល ដែលរោគសញ្ញាធ្ងន់ធ្ងរអាចរួមមានការភាន់ច្រឡំ ងងុយដេក ប្រកាច់ ។ អ្នកដែលមានរោគសញ្ញាទាំងនេះអាចសន្លប់ក្នុងរយៈពេល ២៤-៤៨ម៉ោង ហើយជំងឺបង្កដោយវីរុសនេះពុំទាន់មានឱសថព្យាបាល ឬវ៉ាក់សាំងជាក់លាក់ណាមួយសម្រាប់ការពារនៅឡើយដែរ។
ជាការទប់ស្កាត់ និងកាត់បន្ថយការឆ្លងមេរោគ តាមរយៈលាងដៃរបស់អ្នកឱ្យបានទៀងទាត់ជាមួយសាប៊ូ និងទឹក ចៀសវាងការប៉ះពាល់ជាមួយសត្វប្រចៀវ ច្រឹង ឬជ្រូកឈឺ ចៀសវាងការប៉ះពាល់ ជាមួយឈាម ឬសារធាតុរាវក្នុងរាងកាយរបស់អ្នកជំងឺដែលមានវីរុសនីប៉ាហ៍៕
