រដ្ឋបាលខេត្តកោះកុង រៀបចំកិច្ចប្រជុំផ្សព្វផ្សាយអនុក្រឹត្យស្តីពីការគ្រប់គ្រងសន្តិសុខ សុវត្ថិភាពតាមទីតាំងរស់នៅប្រមូលផ្តុំ

កោះកុង៖ រដ្ឋបាលខេត្តកោះកុង បានរៀបចំកិច្ចប្រជុំផ្សព្វផ្សាយអនុក្រឹត្យរបស់រាជរដ្ឋាភិបាល ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ ក្រោមអធិបតីភាព ឯកឧត្តម ថុង ណារុង ប្រធានក្រុមប្រឹក្សាខេត្តកោះកុង និងលោកជំទាវ ឈី វ៉ា អភិបាល នៃគណៈអភិបាលខេត្ត នាថ្ងៃទី២៧ ខែមករា ឆ្នាំ២០២៦។

នៅក្នុងឱកាសនោះ លោកជំទាវអភិបាលខេត្ត បានលើកឡើងថាពិធីផ្សព្វផ្សាយនាពេលនេះ រៀបចំឡើងក្នុងគោលបំណងឱ្យអ្នកពាក់ព័ន្ធទាំងអស់បានជ្រួតជ្រាប ទូលំទូលាយអំពីខ្លឹមសារ អនុក្រឹត្យ ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ ដើម្បីធានាដល់សន្តិសុខ សុវត្ថិភាពសង្គម និងសណ្តាប់ធ្នាប់សាធារណៈ។ អនុក្រឹត្យនេះមានវិសាលភាពអនុវត្តចំពោះប្រធានអង្គភាព ឬម្ចាស់ទីតាំង រស់នៅប្រមូលផ្តុំ ឬអ្នកគ្រប់គ្រង ទីតាំងរស់នៅប្រមូលផ្តុំ និងអ្នកស្នាក់នៅតាមទីតាំងរស់នៅប្រមូលផ្តុំ នៅក្នុងព្រះរាជាណាចក្រកម្ពុជា លើកលែងតែកន្លែងស្នាក់នៅប្រមូលផ្តុំរបស់កងយោធពលខេមរភូមិន្ទ និង កងកម្លាំងនគរបាលជាតិ។

លោកជំទាវ បានបញ្ជាក់នូវចំណុចសំខាន់ៗមួយចំនួនដែលមានចែងក្នុងអនុក្រឹត្យដូចខាងក្រោម៖

-ក្រសួងមហាផ្ទៃមានសមត្ថកិច្ចដឹកនាំអនុវត្តអនុក្រឹត្យនេះ។ ក្រសួងមហាផ្ទៃធ្វើប្រតិភូកម្មការងារគ្រប់គ្រងការស្នាក់នៅ និងការគ្រប់គ្រងសន្តិសុខសុវត្ថិភាពតាមទីតាំង រស់នៅប្រមូលផ្តុំ ជូនរដ្ឋបាលរាជ ធានី ខេត្ត ក្រុង ស្រុក ខណ្ឌ។ រដ្ឋបាលរាជធានី ខេត្ត ក្រុង ស្រុក ខណ្ឌ ត្រូវមានគណនេយ្យភាពចំពោះក្រសួងមហាផ្ទៃ ក្នុងការអនុវត្តការងារដែលបានទទួលប្រតិភូកម្មពាក់ព័ន្ធនឹងការគ្រប់គ្រងការស្នាក់នៅ និងការគ្រប់គ្រងសន្តិសុខសុវត្ថិភាពតាមទីតាំង។
-អភិបាល នៃគណៈអភិបាលរាជធានី ខេត្ត ក្រុង ស្រុក ខណ្ឌ ដែលមានតួនាទីជាប្រធានគណៈបញ្ជាការឯកភាពរដ្ឋបាលរាជធានី ខេត្ត ក្រុង ស្រុក ខណ្ឌ មានភារកិច្ចដឹកនាំ ត្រួតពិនិត្យ និងជំរុញការអនុវត្តការងារគ្រប់គ្រង ការស្នាក់នៅតាមទីតាំងរស់នៅប្រមូលផ្តុំ។

-អភិបាល នៃគណៈអភិបាលរាជធានី ខេត្ត ក្រុង ស្រុក ខណ្ឌ មានភារកិច្ចដឹកនាំការងារ គ្រប់គ្រងសន្តិសុខ សុវត្ថិភាពតាមទីតាំងប្រមូលផ្តុំ។ អភិបាល នៃគណៈអភិបាលរាជធានី ខេត្ត ក្រុង ស្រុក ខណ្ឌ អាចតម្រូវឱ្យប្រធានអង្គភាពឬអ្នកគ្រប់គ្រង ឬអ្នកតំណាងនៃទីតាំងរស់នៅប្រមូលផ្តុំ ផ្តល់បញ្ជី ឈ្មោះអ្នកស្នាក់នៅ និងឯកសារសម្គាល់ការស្នាក់នៅ និង/ឬ ឯកសារផ្សេងៗពាក់ព័ន្ធនឹងការស្នាក់នៅ តាមទីតាំងរស់នៅប្រមូលផ្តុំជូនសមត្ថកិច្ចពាក់ព័ន្ធលើការងារគ្រប់គ្រងសន្តិសុខសុវត្ថិភាពតាមការកំណត់។

ខាងលើនេះជាខ្លឹមសារនៃមាត្រាសំខាន់ៗ ដែលពាក់ព័ន្ធនឹងអភិបាល នៃគណៈអភិបាល រាជធានី ខេត្ត ក្រុង ស្រុក ខណ្ឌ និងឃុំ សង្កាត់ដែលត្រូវចូលរួមអនុវត្ត ក្នុងនោះក៏នៅមានមាត្រា ដែល ពាក់ព័ន្ធនឹងតួនាទីភារកិច្ចរបស់ស្នងការនគរបាលរាជធានី ខេត្ត និងអធិការនគរបាលក្រុង ស្រុក ខណ្ឌ ក៏ដូចជា ប៉ុស្តិ៍នគរបាលរដ្ឋបាលឃុំ សង្កាត់ ដែលត្រូវចូលរួមអនុវត្ត និងត្រូវមានកិច្ចសហការរវាងស្ថាប័នរដ្ឋ វិស័យឯកជន ដែលមានដូចជា៖ អ្នកគ្រប់គ្រងតំបន់សេដ្ឋកិច្ចពិសេស ម្ចាស់ក្រុមហ៊ុន សណ្ឋាគារ ផ្ទះសំណាក់ ផ្ទះជួល និងសហគមន៍មូលដ្ឋានដែលមានប្រជាពលរដ្ឋជាតួអង្គសំខាន់ក្នុងការរាយការណ៍នៅ ពេលមានការសង្ស័យលើករណីមានការប្រមូលផ្តុំដោយខុសច្បាប់៕