ប្រមុខការពារជាតិកម្ពុជាសង្ឃឹមថា ការឆ្លងឆ្នាំសកលខាងមុខនេះនឹងពោរពេញដោយសុខសន្តិភាព សុវត្ថិភាព និងសេចក្តីសុខជូនទៅដល់ប្រជាពលរដ្ឋទាំងកម្ពុជានិងថៃ
ភ្នំពេញ៖ តាមរយៈបណ្ដាញសង្គម នៅថ្ងៃទី២៨ ខែធ្នូ ឆ្នាំ២០២៥ ឯកឧត្តមឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិកម្ពុជា បានលើកឡើងថា “ កិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ នៅច្រកអន្តរជាតិព្រំ-ផាកកាត ខេត្តប៉ៃលិន ប្រទេសកម្ពុជា ទល់នឹងខេត្តចន្ទបុរី ប្រទេសថៃ ដោយមានការចូលរួមសង្កេតពីក្រុមអ្នកសង្កេតការណ៍អាស៊ាន (AOT)។
កម្ពុជា-ថៃ ព្រមព្រៀងគ្នាអនុវត្តបទឈប់បាញ់ដែលនឹងចូលជាធរមានចាប់ពីម៉ោង១២:០០ ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ នេះតទៅ។ ក្រោយបទឈប់បាញ់ត្រូវបានអនុវត្តដោយពេញលេញ រយៈពេល៧២ម៉ោង យោធិនកម្ពុជា១៨ រូបនឹងត្រូវដោះលែងត្រលប់មកកម្ពុជាវិញស្របតាមស្មារតីនៃសេចក្តីថ្លែងការណ៍រួមទីក្រុងគួឡា ឡាំពួ ដែលបានចុះហត្ថលេខានៅថ្ងៃទី២៦ ខែតុលា ឆ្នាំ២០២៥។
ខ្ញុំសង្ឃឹមថាភាគីថៃ នឹងអនុវត្តតាមស្មារតីនៃកិច្ចប្រជុំពិសេសនេះប្រកបដោយតម្លាភាពស្មោះត្រង់ គោរពបទឈប់បាញ់ដើម្បីសុខសន្តិភាពរបស់កងទ័ពនិងប្រជាជននៃប្រទេសទាំងពីរ។ យើងត្រូវធ្វើការរួមគ្នាដើម្បីទទួលបាននូវជំនឿទុកចិត្តនិងការវិលទៅប្រក្រតីភាពឡើងវិញ។
ខ្ញុំសូមជូនពរដោយសេចក្តីសង្ឃឹមថា ការឆ្លងឆ្នាំសកល ២០២៥ ឈានចូល ២០២៦ខាងមុខនេះ នឹងពោរពេញទៅដោយសុខសន្តិភាព សុវត្ថិភាព និងសេចក្តីសុខជូនទៅដល់ប្រជាពលរដ្ឋទាំងកម្ពុជានិងថៃ”៕
