សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់ឱ្យគណៈប្រតិភូចូលរួមគោរពវិញ្ញាណក្ខន្ធ រំលែកទុក្ខដ៏ក្រៀមក្រំបំផុតចំពោះមរណភាពវីរយុទ្ធជន ង៉ ក្រូច ដែលបានពលីក្នុងសមរភូមិ

រតនគិរី៖ នៅថ្ងៃទី ២៥ ខែ ធ្នូ ឆ្នាំ២០២៥ ឯកឧត្តម ញ៉ែម សំអឿន ប្រធានគណៈកម្មាធិការសាខាកាកបាទក្រហមកម្ពុជា ខេត្តរតនគិរី ដឹកនាំគណៈប្រតិភូសាខា ចូលរួមគោរពវិញ្ញាណក្ខន្ធវីរយុទ្ធជន ង៉ ក្រូច ដែលបានពលីក្នុងសមរភូមិ កាលពីថ្ងៃទី១០ ខែធ្នូ ឆ្នាំ២០២៥ ឈរជើងនៅតំបន់អានសេះ ខេត្តព្រះវិហារ។ ពិធីបុណ្យសពប្រព្រឹត្តទៅនៅគេហដ្ឋាន ភូមិ តាហ៉ើយ ឃុំតឺន ស្រុកកូនមុំ ខេត្តរតនគិរី។

ក្នុងសមានទុក្ខក្ដុកក្ដួល ខ្សឹបខ្សួលរំជួលចិត្តឥតឧបមាចំពោះវីរយុទ្ធជនដ៏អង់អាចក្លាហានដែលបានពលីក្នុងសមរភូមិ ឯកឧត្តម ញ៉ែម សំអឿន បាននាំប្រសាសន៍រំលែកទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារសពវីរយុទ្ធជន ង៉ ក្រូច ដែលបានពលីក្នុងសមរភូមិ ប្រកបដោយការគោរពដឹងគុណ និងចងចាំជានិច្ចចំពោះវីរភាពដ៏អង់អាចក្លាហាន បានបូជាជីវិតដើម្បីជាតិមាតុភូមិ។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានឧបត្ថម្ភគ្រឿងឧបភោគបរិភោគ និងថវិកាមួយចំនួន ជូនដល់ក្រុមគ្រួសារសពវីរយុទ្ធជនពលី និងសូមឧទ្ទិសបួងសួងដល់ដួងវិញ្ញាណក្ខន្ធសព សូមបានទៅកាន់សុគតិភពកុំបីឃ្លៀងឃ្លាតឡើយ៕