មេទ័ពជាន់ខ្ពស់របស់រុស្ស៊ីម្នាក់បានទទួលមរណភាពបន្ទាប់ពីរងរបួសធ្ងន់ក្នុងហេតុការណ៍ផ្ទុះគ្រាប់បែកដែលបង្កប់នៅក្រោមរថយន្តរបស់លោក

មូស្គូ៖ លោកឧត្តមសេនីយ៍ឯក ហ្វានីល សាវ៉ារ៉ូវ (Fanil Sarvarov) ប្រធាននាយកដ្ឋានហ្វឹកហ្វឺនប្រតិបត្តិការនៃអគ្គសេនាធិការកងទ័ពរុស្ស៊ី បានទទួលមរណភាពកាលពីថ្ងៃទី២២ធ្នូ បន្ទាប់ពីរងរបួសធ្ងន់ក្នុងហេតុការណ៍ផ្ទុះគ្រាប់បែកដែលបង្កប់នៅក្រោមរថយន្តរបស់លោក។ នេះជាការសម្លាប់មន្ត្រីយោធាជាន់ខ្ពស់លើកទីបី ក្នុងរយៈពេលជាងមួយឆ្នាំ ខណៈក្រុមអ្នកស៊ើបអង្កេតរុស្ស៊ី អះអាងថា អ៊ុយក្រែនអាចជាអ្នកនៅពីក្រោយនៃការវាយប្រហារនេះ។

លោក សាវ៉ារ៉ូវ វ័យ៥៦ឆ្នាំ គឺជាមន្ត្រីយោធាជាន់ខ្ពស់ទី៣ ដែលត្រូវបានគេលួចធ្វើឃាតក្នុងរដ្ឋធានីមូស្គូ ក្នុងរយៈពេលជាងមួយឆ្នាំចុងក្រោយនេះ ដែលនេះជាសញ្ញានៃការធ្លាក់ចុះសន្តិសុខ។ គណៈកម្មាធិការស៊ើបអង្កេតរុស្ស៊ី បានប្រកាសបើកសំណុំរឿងព្រហ្មទណ្ឌ និងបានដាក់ការសង្ស័យជាអាទិភាពថា នេះគឺជាប្រតិបត្តិការរៀបចំឡើងដោយទីភ្នាក់ងារសម្ងាត់របស់អ៊ុយក្រែន តែខាងរដ្ឋធានីកៀវមិនទាន់មានប្រតិកម្មផ្លូវការណាមួយ ចំពោះការចោទប្រកាន់នេះទេ។

លោកឧត្តមសេនីយ៍ សាវ៉ារ៉ូវ គឺជាមេទ័ពដែលមានបទពិសោធជោគជាំក្នុងសមរភូមិធំៗ រួមមានសង្គ្រាមនៅតំបន់ Chechnya និងយុទ្ធនាការយោធារបស់រុស្ស៊ីនៅប្រទេសស៊ីរី ចន្លោះឆ្នាំ២០១៥-២០១៦ មុនពេលលោកមកកាន់តំណែងបច្ចុប្បន្ន។

អ្នកវិភាគយោធារុស្ស៊ី បានចាត់ទុកហេតុការណ៍នេះថា ជាការកើនឡើងនៃអំពើភេរវកម្ម ក្នុងគោលបំណងបំភិតបំភ័យមន្ត្រីជាន់ខ្ពស់រុស្ស៊ី។ ការលួចធ្វើឃាតនេះបានកើតឡើងស្របពេលដែលរុស្ស៊ី និងអ៊ុយក្រែន កំពុងស្ថិតក្នុងដំណាក់កាលពិភាក្សាស្វែងរកសន្តិភាពតាមរយៈការសម្របសម្រួលពីសហរដ្ឋអាម៉េរិក ប៉ុន្តែសកម្មភាពនេះអាចនឹងក្លាយជាឧបសគ្គថ្មី ដែលធ្វើឱ្យស្ថានការណ៍កាន់តែតានតឹងថែមទៀត៕