នាយឧត្តមសេនីយ៍ សេង យូអ៊ាន់ ដឹកនាំកិច្ចប្រជុំពិភាក្សា លើការរៀបចំផែនការយុទ្ធសាស្រ្ត ៣ឆ្នាំរំកិល និងគម្រោងចំណូល-ចំណាយថវិកា ២០២៣

ភ្នំពេញ៖ ឯកឧត្តម ឧត្តមសេនីយ៍ឯក ណុប វី អគ្គនាយករង និងជាប្រធានក្រុមការងារថវិកា នៃអគ្គនាយកដ្ឋានអន្តោប្រវេសន៍ នាព្រឹកថ្ងៃទី១ ខែកក្កដា ឆ្នាំ២០២២នេះ បានដឹកនាំក្រុមការងាររៀបចំថវិកា ចូលរួមកិច្ចប្រជុំពិភាក្សាលើការរៀបចំផែនការយុទ្ធសាស្រ្ត ៣ឆ្នាំរំកិល ( ២០២៣ – ២០២៥ ) និងគម្រោងចំណូល-ចំណាយថវិកា ២០២៣ ក្រោមអធិបតីភាព ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភានិងហិរញ្ញវត្តុ ក្រសួងមហាផ្ទៃ ។

ក្នុងជំនួបពិភាក្សានេះដែរ ឯកឧត្តមឧត្តមសេនីយ៍ឯក ណុប វី បានមានប្រសាសន៍ថ្លែងអំណរគុណដល់ ឯកឧត្តម ឧត្តមសេនីយ៍ឯក សេង យូអ៊ាន់ អគ្គនាយកភស្តុភានិងហិរញ្ញវត្ថុដែលបានរៀបចំកិច្ចប្រជុំនេះ និងជួយជ្រោមជ្រែងយកចិត្តទុកដាក់ គាំទ្រគម្រោងសំណើរសុំថវិការបស់ អគ្គនាយកដ្ឋានអន្តោប្រវេសន៍ សម្រាប់ផែនការឆ្នាំ២០២៣ ដែលនឹងត្រូវដាក់ជួបទៅ ក្រសួងហិរញ្ញវត្តុនាពេលខាងមុខនេះ៕