រដ្ឋសភាកម្ពុជា-សភាតំណាងប្រជាជនចិនតំបន់ស្វយ័តស៊ីចាង ផ្លាស់ប្តូរបទពិសោធន៍ និងរៀនសូត្រពីគ្នាពីការអភិវឌ្ឍ និងការអនុវត្តល្អៗ

ភ្នំពេញ៖ ឯកឧត្តម ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ (គណៈកម្មការទី៧) នៃរដ្ឋសភា បានជួបពិភាក្សាការងារជាមួយ ឯកឧត្តម ជៀន ឆាន (Jiancan) អនុប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនចិនតំបន់ស្វយ័តស៊ីចាង (Xizang) នៃសាធារណរដ្ឋប្រជាមានិតចិន នាព្រឹកថ្ងៃទី២៧ ខែវិច្ឆិកា ឆ្នាំ២០២៥ នៅវិមានរដ្ឋសភា។

ជំនួបពិភាក្សានេះផ្តោតទៅលើការចែករំលែកបទពិសោធន៍ និងស្វែងយល់ក្នុងការអភិវឌ្ឍឧស្សាហកម្មទេសចរណ៍ វិស័យកសិកម្ម វប្បធម៌ និងវិស័យមួយចំនួនទៀត ព្រមទាំងរៀនសូត្រពីការអនុវត្ត និងបទពិសោធន៍របស់ប្រទេសកម្ពុជាក្នុងការជំរុញឧស្សាហកម្មទេសចរណ៍។

ក្នុងឱកាសនោះ ឯកឧត្តម ជៀន ឆាន បានចែករំលែកបទពិសោធន៍ និងការអនុវត្តល្អៗអំពីវឌ្ឍនភាព ដំណោះស្រាយបញ្ហាប្រឈម ការដឹកនាំ និងការអភិវឌ្ឍ ក្នុងវិស័យសេដ្ឋកិច្ច កំណែទម្រង់ ទេសចរណ៍ អប់រំ សុខាភិបាល វប្បធម៌ និងសាសនា។

ឯកឧត្តមអនុប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជនចិនតំបន់ស្វយ័តស៊ីចាង បានជម្រាបថា តំបន់ស្វយ័តស៊ីចាង នឹងជំរុញអ្នកវិនិយោគ និងអ្នកទេសចរពីខេត្តស៊ីចាង មកកាន់កម្ពុជាឱ្យបានច្រើនបន្ថែមទៀត។

ឯកឧត្តម ជៀន ឆាន ក៏បានជម្រាបពីស្ថានភាពភូមិសាស្រ្ត និងការរីកចម្រើនដ៏ឆាប់រហ័សរបស់ខេត្តស៊ីចាង ក្រោមការយកចិត្តទុកដាក់ពីបក្សកុម្មុយនីស្តចិន និងរដ្ឋាភិបាលចិន ក្រោមការដឹកនាំរបស់ ឯកឧត្ដមប្រធានាធិបតី ស៊ី ជីនពីង ធ្វើឱ្យខេត្តស៊ីចាងមានការរីកចម្រើនគ្រប់វិស័យ និងជាតំបន់ទេសចរណ៍ធម្មជាតិដ៏ទាក់ទាញមួយរបស់ប្រទេសចិន មានផ្លូវគមនាគមន៍ខ្វាត់ខ្វែង។ ផលិតផលក្នុងស្រុកសរុប (GDP) បានកើនឡើងខ្ពស់បំផុតលំដាប់ទី៣នៅទូទាំងប្រទេសចិន។

ដើម្បីភ្ជាប់ទំនាក់ទំនងប្រជាជនកម្ពុជា និងខេត្តស៊ីចាងឱ្យកាន់តែជិតស្និទ្ធបន្ថែមទៀត ឯកឧត្តម ជៀន ធាន បានគោរពអញ្ជើញឯកឧត្តមប្រធានគណៈកម្មការទី៧ រដ្ឋសភា បំពេញទស្សនកិច្ចនៅខេត្តស៊ីចាង តាមពេលវេលាសមស្របណាមួយ។

ឯកឧត្តម ប៉ា សុជាតិវង្ស បានថ្លែងថា ជំនួបប្រជុំនេះ គឺជាឱកាសដ៏មានតម្លៃក្នុងការពង្រឹងទំនាក់ទំនងមិត្តភាព និងកិច្ចសហការ។ កិច្ចសហប្រតិបត្តិការរវាងរដ្ឋសភាកម្ពុជា និងសភាខេត្តស៊ីចាង គឺជាស្ពានដ៏សំខាន់ដែលនាំឱ្យប្រជាជន និងស្ថាប័ននៃប្រទេសទាំងពីរកាន់តែមានទំនាក់ទំនងកាន់តែជិតស្និទ្ធ។ ជាពិសេសចែករំលែកបទពិសោធន៍ ដើម្បីកសាងមូលដ្ឋានគ្រឹះសម្រាប់ការអភិវឌ្ឍប្រទេសជាតិរួមគ្នា។

ឯកឧត្តមបានរំលេចពីវិស័យទេសចរណ៍កម្ពុជា និងចិន។ ឆ្នាំទេសចរណ៍កម្ពុជា-ចិន ២០២៥ ត្រូវបានប្រកាសដោយថ្នាក់ដឹកនាំកម្ពុជា និងចិន កាលពីខែមេសា ក្នុងអំឡុងទស្សនកិច្ចផ្លូវរដ្ឋ របស់លោកប្រធានាធិបតីចិន ស៊ី ជីនពីង មកកាន់កម្ពុជា។ គំនិតផ្តួចផ្តើមនេះ សង្កត់ធ្ងន់លើសក្តានុពលដ៏ធំធេង សម្រាប់ការពង្រឹងកិច្ចសហប្រតិបត្តិការទេសចរណ៍ រវាងប្រទេសអាស៊ីទាំងពីរ។

ឯកឧត្តម ក៏បានលើកឡើងអំពី «ទិដ្ឋាការមេគង្គ-ឡានឆាង» ដែលដាក់ចេញដោយប្រទេសចិន នៅខែវិច្ឆិកា ឆ្នាំ២០២៤ ជួយសម្រួលដល់ការធ្វើដំណើររវាងប្រទេសទាំងពីរ ដែលមានអរិយធម៌បុរាណ ប្រវត្តិសាស្ត្រយូរលង់ និងលេចធ្លោលើការគោរពភាពចម្រុះនៃវប្បធម៌ក្នុងពិភពលោក តម្លៃរួមនៃមនុស្សជាតិ បេតិកភណ្ឌវប្បធម៌ និងនវានុវត្តន៍។

ឯកឧត្តមបានបន្តថា ការប្រកាសឆ្នាំ២០២៥ ជាឆ្នាំទេសចរណ៍ កម្ពុជា-ចិន និងកិច្ចខិតខំប្រឹងប្រែងរួមគ្នាក្នុងការថែរក្សា បេតិកភណ្ឌវប្បធម៌នៃរមណីដ្ឋានអង្គរ នឹងលើកកម្ពស់អត្តសញ្ញាណតំបន់រួមគ្នា ពង្រឹងទំនាក់ទំនងរវាងប្រជាជន និងប្រជាជននៅទូទាំង សមាគមប្រជាជាតិអាស៊ីអាគ្នេយ៍ (អាស៊ាន)។ កម្ពុជា និងចិន ជាមិត្តដែកថែប ដែលជឿទុកចិត្តគ្នាទៅវិញទៅមក និងគាំទ្រគ្នាគ្រប់កាលៈទេសៈ។ ឆ្នាំទេសចរណ៍ កម្ពុជា-ចិន ២០២៥ បានចាប់ផ្តើមជំពូកថ្មីនៃកិច្ចសហប្រតិបត្តិការទេសចរណ៍ទ្វេភាគី និងពង្រឹងទំនាក់ទំនងមិត្តភាព ប្រពៃណីកម្ពុជា-ចិន។

ឆ្នាំទេសចរណ៍ កម្ពុជា-ចិន ២០២៥ រួមជាមួយនឹងគំនិតផ្តួចផ្តើម ពិភពលោកដែលមានស្រាប់របស់ចិន ដូចជាគំនិតផ្តួចផ្តើមខ្សែក្រវាត់ និងផ្លូវ គំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល នឹងចាក់បញ្ចូលកម្លាំងជំរុញកាន់តែខ្លាំងក្នុងការកសាងសហគមន៍វាសនារួម កម្ពុជា-ចិន គ្រប់រដូវកាល ក្នុងយុគសម័យថ្មី។

ក្នុងឱកាសនោះដែរ ឯកឧត្តមក៏បានជម្រាបភាគីចិន អំពីសេដ្ឋកិច្ច និងពាណិជ្ជកម្មរបស់កម្ពុជា។ កម្ពុជា មានស្ថិរភាពនយោបាយ កម្លាំងពលករវ័យក្មេង និងឆ្លាតវៃ និងការចូលដំណើរការទីផ្សារអន្តរជាតិជាច្រើន តាមរយៈកិច្ចព្រមព្រៀងពាណិជ្ជកម្ម។ វិស័យដែលមានសក្តានុពលរួមមាន កសិកម្មបៃតង ឧស្សាហកម្មស្អាត សហគ្រាសតូច មធ្យម និងទេសចរណ៍។

ឯកឧត្តមប្រធានគណៈកម្មការទី៧ បានអំពាវនាវដល់វិនិយោគិនស៊ីចាង ពិចារណាមកវិនិយោគនៅកម្ពុជា ទទួលបានអត្ថប្រយោជន៍ពីបរិយាកាសអាជីវកម្មល្អ គោលនយោបាយលើកទឹកចិត្តសម្រាប់វិស័យវិនិយោគទុន ហើយជាដំណាក់កាលពង្រឹងមិត្តភាពដ៏វែងឆ្ងាយ និងសេចក្តីចម្រើនរួម របស់ប្រទេសទាំងពីរ៕