មនុស្សជាង ១១ ០០០នាក់ នៅក្នុងរដ្ឋចំនួន៧ របស់ម៉ាឡេស៊ីរងផលប៉ះពាល់ដោយសារទឹកជំនន់បង្កឡើងដោយភ្លៀងធ្លាក់ខ្លាំង
គូឡាឡំាពួ៖ បើតាមទីភ្នាក់ងារគ្រប់គ្រងគ្រោះមហន្តរាយ របស់ម៉ាឡេស៊ី ដកស្រង់ចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៤ ខែវិច្ឆិកា បានបញ្ជាក់ថា មនុស្សជាង ១១ ០០០នាក់ នៅក្នុងរដ្ឋចំនួន៧ របស់ម៉ាឡេស៊ី បានរងផលប៉ះពាល់ដោយសារទឹកជំនន់បង្កឡើងដោយភ្លៀងធ្លាក់ខ្លាំង។
គ្រោះទឹកជំនន់តែងតែកើតឡើងជារឿយៗនៅតាមបណ្ដោយឆ្នេរភាគខាងកើតម៉ាឡេស៊ី អំឡុងរដូវមូសុងប្រចាំឆ្នាំ ចាប់ពីខែតុលា រហូតដល់ខែមីនា ដែលតែងតែបង្ខំឱ្យប្រជាជនម៉ាឡេស៊ីជម្លៀសខ្លួន ជារៀងរាល់ឆ្នាំ។
របាយការណ៍មួយរបស់ទីភ្នាក់ងារគ្រប់គ្រងគ្រោះមហន្តរាយម៉ាឡេស៊ីបានបង្ហាញថាមនុស្ស ១១ ០០៩នាក់ ឬ៣ ៨៣៩គ្រួសារបានរងផលប៉ះពាល់ដោយសារតែទឹកជំនន់នៅក្នុងរដ្ឋ Kedah, Kelantan, Penang, Perak, Perlis, Terengganu និងរដ្ឋ Selangor គិតត្រឹមម៉ោង៦ព្រឹក ថ្ងៃចន្ទនេះ (ម៉ោងនៅក្នុងតំបន់)។
គួរបញ្ជាក់ថា បើតាមទីភ្នាក់ងារគ្រប់គ្រងគ្រោះមហន្តរាយម៉ាឡេស៊ី រដ្ឋ Kelantan ស្ថិតភាគឦសាននៃប្រទេសជាប់ព្រំដែនជាមួយថៃ បានរងគ្រោះធ្ងន់ធ្ងរជាងគេ ដោយមានមនុស្ស ៨២២៨នាក់ រងផលប៉ះពាល់។ តែមិនមានសេចក្ដីរាយការណ៍ពីអ្នកស្លាប់នោះទេ៕
