រដ្ឋមន្ត្រីការបរទេសរុស្ស៉ី៖ នីតិវិធីធ្វើការកំពុងដំណើរការទៅមុខដើម្បីត្រៀមលក្ខណៈសម្រាប់លទ្ធភាពដែលរុស្ស៉ីអាចនឹងធ្វើតេស្ដនុយក្លេអ៊ែរ

មូស្គូ៖ បើតាមការដកស្រង់ចេញផ្សាយដោយទីភ្នាក់ងារសារព័ត៌មាន Reuters រដ្ឋមន្ត្រីការបរទេសរុស្ស៉ី លោក Sergei Lavrov បានឱ្យដឹងកាលពីថ្ងៃសៅរ៍ ទី៨ ខែវិច្ឆិកា ថានីតិវិធីធ្វើការកំពុងដំណើរការទៅមុខតាមបទបញ្ជារបស់លោកប្រធានាធិបតី វ្ល៉ឌីមៀ ពូទីន ដើម្បីត្រៀមលក្ខណៈសម្រាប់លទ្ធភាពដែលរុស្ស៉ីអាចនឹងធ្វើតេស្ដនុយក្លេអ៊ែរ។

តាមរយៈការស្រង់សម្ដីចុះផ្សាយដោយទីភ្នាក់ងារសារព័ត៌មានរុស្ស៉ី TASS លោក Lavrov បានគូសបញ្ជាក់ថា «ពាក់ព័ន្ធនឹងបទបញ្ជារបស់លោកប្រធានាធិបតី វ្ល៉ាឌីមៀ ពូទីន នៅឯ កិច្ចប្រជុំក្រុមប្រឹក្សាសន្តិសុខរុស្ស៉ីកាលពីថ្ងៃទី៥ ខែវិច្ឆិកា បទបញ្ជានោះត្រូវបានទទួលយកសម្រាប់ការអនុវត្តតាម និងកំពុងស្ថិតក្នុងនីតិវិធីធ្វើការ ហើយសាធារណជននឹងត្រូវបានជូនដំណឹង ពីលទ្ធផល»។

បទបញ្ជារបស់លោក ពូទីន ធ្វើឡើងជាការឆ្លើយតបទៅនឹងការប្រកាសដ៏ភ្ញាក់ផ្អើលមួយរបស់ប្រធានាធិបតីអាមេរិក លោក ដូណាល់ ត្រាំ កាលពីសប្ដាហ៍មុនថាសហរដ្ឋអាមេរិកនឹងចាប់ផ្ដើម ធ្វើតេស្ដនុយក្លេអ៊ែរឡើងវិញ។ តាមទីភ្នាក់ងារសារព័ត៌មាន TASS លោក Lavrov ក៏បានសង្កត់ធ្ងន់ផងដែរថារុស្ស៉ីមិនបានទទួលការបញ្ជាក់ជាផ្លូវការណាមួយពីសហរដ្ឋអាមេរិកនោះទេ ជុំវិញបទបញ្ជារបស់លោក ត្រាំ។

គួរបញ្ជាក់ថា ទំនាក់ទំនងរវាងរុស្ស៉ី និងសហរដ្ឋអាមេរិកបានស្គាល់ភាពតានតឹងក្នុងរយៈពេលប៉ុន្មានសប្ដាហ៍ថ្មីៗនេះ ខណៈលោក ត្រាំ បង្ហាញការខកចិត្តចំពោះកិច្ចចរចាបិទបញ្ចប់សង្រ្គាមនៅអ៊ុយក្រែន៕