ឥណ្ឌា សាកល្បងបច្ចេកទេសបង្កើតភ្លៀងនៅលើមេឃទីក្រុងញូវដេលីដែលកំពុងរងការបំពុលដោយផ្សែងពុលយ៉ាងខ្លាំង ដើម្បីលាងសម្អាតខ្យល់ពុលក្នុងទីក្រុង
ញូវដេលី៖ បើតាមការចេញផ្សាយ ដោយទីភ្នាក់ងារព័ត៌មាន AFP អាជ្ញាធរឥណ្ឌា នៅថ្ងៃអង្គារនេះបានធ្វើការសាកល្បងបច្ចេកទេសបង្កើតភ្លៀង (cloud-seeding) នៅលើមេឃទីក្រុងញូវដេលីដែលកំពុងរងការបំពុលដោយផ្សែងពុលយ៉ាងខ្លាំង ក្នុងគោលបំណងបង្កឱ្យមានភ្លៀងធ្លាក់ ដើម្បីលាងសម្អាតខ្យល់ពុលក្នុងទីក្រុង។
រដ្ឋមន្ត្រីក្រុងដេលី លោក ម៉ាន់ជីនដឺ ស៊ីង សឺសា (Manjinder Singh Sirsa) បាននិយាយថា ការសាកល្បងនេះត្រូវបានធ្វើឡើងដោយសហការជាមួយវិទ្យាស្ថានបច្ចេកវិទ្យាឥណ្ឌា ហើយមានផែនការធ្វើបន្ថែមទៀតនៅថ្ងៃខាងមុខ។ ទោះជាយ៉ាងណា គុណភាពខ្យល់នៅក្នុងទីក្រុងនៅតែស្ថិតក្នុងកម្រិត «អន់ខ្លាំង» ដដែល។
បច្ចេកទេសបង្កើតភ្លៀង គឺជាវិធីសាស្ត្រមួយដែលគេបាញ់សារធាតុគីមីទៅក្នុងពពកដើម្បីបង្កឱ្យមានភ្លៀងធ្លាក់ ហើយវាត្រូវបានគេប្រើប្រាស់ជាញឹកញាប់នៅតំបន់ដែលងាយរងគ្រោះដោយគ្រោះរាំងស្ងួត។ ទោះជាយ៉ាងណា អ្នកជំនាញជាច្រើននៅតែមានចម្ងល់អំពីប្រសិទ្ធភាពរបស់វា។
គួរបញ្ជាក់ថា គុណភាពខ្យល់នៅទីក្រុងញូវដេលី តែងតែធ្លាក់ចុះយ៉ាងខ្លាំងជារៀងរាល់រដូវរងា ដោយសារកសិករដុតកាកសំណល់កសិកម្ម ខណៈដែលសីតុណ្ហភាពត្រជាក់បានធ្វើឱ្យផ្សែងទាំងនោះមិនអាចរសាត់ទៅណាបាន៕
