កងទ័ពជើងទឹកអាមេរិក៖ យន្តហោះចម្បាំង១គ្រឿង និងឧទ្ធម្ភាគចក្រ១គ្រឿង មកពីនាវាផ្ទុកយន្តហោះចម្បាំង USS Nimitz បានធ្លាក់នៅលើសមុទ្រចិនខាងត្បូង

វ៉ាស៉ីនតោន៖ បើតាមការចេញផ្សាយ ដោយទីភ្នាក់ងារព័ត៌មានAP កងទ័ពជើងទឹករបស់សហរដ្ឋអាមេរិក បានឱ្យដឹងថា កាលពីថ្ងៃអាទិត្យ ទី២៦ ខែតុលា យន្តហោះចម្បាំង១គ្រឿង និងឧទ្ធម្ភាគចក្រ១គ្រឿង មកពីនាវាផ្ទុកយន្តហោះចម្បាំង USS Nimitz បានធ្លាក់នៅលើសមុទ្រចិនខាងត្បូង ក្នុងពេលរំលងគ្នា ត្រឹម៣០នាទី ខណៈមូលហេតុនៃការធ្លាក់យន្តហោះទាំង២គ្រឿង កំពុងស្ថិតក្រោមការស៉ើបអង្កេត។

យោធាអាមេរិក បាននិយាយថា សមាជិកទាំង៣នាក់ នៅលើឧទ្ធម្ភាគចក្រ MH-60R Sea Hawk ត្រូវបានជួយសង្រ្គោះ ខណៈអាកាសយានិកទាំង២នាក់ នៅលើយន្តហោះចម្បាំង F/A-18F Super Hornet បានប្រើប្រព័ន្ធសុវត្ថិភាព ផ្តាច់កៅអីចេញពីយន្តហោះ និងត្រូវបានជួយសង្រ្គោះដូចគ្នា ពោលគឺអ្នកទាំង៥ មានសុវត្ថិភាពទាំងអស់ និងស្ថិតក្នុងស្ថានភាពនឹងនរ។

ឧប្បត្តិហេតុខាងលើ កើតឡើងស្របពេលដែល នាវា Nimitz វិលត្រឡប់មកកាន់មូលដ្ឋានរបស់ខ្លួនវិញ ក្នុងរដ្ឋវ៉ាស៉ីនតោន ក្រោយត្រូវបានដាក់ពង្រាយទៅកាន់តំបន់មជ្ឈិមបូព៌ា៕