ឯកឧត្តម សួស ប្រាថ្នា កត់សម្គាល់ឃើញថា ការអនុវត្តនៃគម្រោងមូលនិធិឃុំ សង្កាត់ នៅមានភាពមិនប្រក្រតី និងទទួលរងនូវការរិះគន់ពីសាធារណមតិ

ភ្នំពេញ៖ ក្នុងឱកាសអញ្ជើញជាអធិបតីដឹកនាំកិច្ចប្រជុំ ពិនិត្យនិងពិភាក្សាការងារលើការកែសម្រួលសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ នៅថ្ងៃទី១៤ ខែតុលា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានធ្វើកត់សម្គាល់ថា ការអនុវត្តនៃគម្រោងមូលនិធិឃុំ សង្កាត់ នៅមានភាពមិនប្រក្រតី និងទទួលរងនូវការរិះគន់ពីសាធារណមតិតាមបណ្តាញសារព័ត៌មាន និងបណ្តាញសង្គមនានា រួមទាំងការដាក់ពាក្យបណ្តឹងដោយផ្ទាល់មកកាន់ក្រសួងមហាផ្ទៃ និងអង្គភាពប្រឆាំងអំពើរពុករលួយ ពាក់ព័ន្ធនឹងភាពមិនប្រក្រតីនៅក្នុងដំណើរការដេញថ្លៃ និងអនុវត្តគម្រោង។

ឯកឧត្ដមបន្តថា ភាពមិនប្រក្រតីទាំងនោះ រួមមាន៖ ការដេញថ្លៃមិនបានប្រកាសជូនដំណឹងជាសាធារណៈ, ការចុះអនុវត្តគម្រោងមុនការដេញថ្លៃ, ការពន្យារការដេញថ្លៃដោយមិនបានកំណត់នូវកាលបរិច្ឆេទ និងពេលវេលាច្បាស់លាស់នៃការដេញថ្លៃបន្ទាប់, ការអនុវត្តគម្រោងរបស់អ្នកទទួលការមិនស្របតាមបទដ្ឋានបច្ចេកទេស, ភាពគ្មានសណ្តាប់ធ្នាប់នៅក្នុងកិច្ចប្រជុំបើកសំណើដេញថ្លៃ, ការបន្ថែមលទ្ធផលកិច្ចសន្យាដោយមិនបានផ្អែកតាមតម្លៃឯកតាដែលបានសរសេរក្នុងសំណើដេញថ្លៃដែលឈ្នះ, ការផ្លាស់ប្តូរទីតាំងលទ្ធផលគម្រោង ឬការបង្កើនបន្ថែមលទ្ធផលគម្រោងនូវទីតាំងដែលមិនបានសិក្សា ឬសិក្សាតែផ្នែកណាមួយ រួមជាមួយបញ្ហាផ្សេងៗទៀត។ ក្រៅពីនេះ ភាពមិនប្រក្រតី ក៏កើតឡើង ដោយសារភាពចន្លោះខ្វះខាតមួយចំនួន ដែលមិនមានចែងច្បាស់លាស់នៅក្នុងសៀវភៅណែនាំស្តីពីការអនុវត្តមូលនិធិឃុំ សង្កាត់ផងដែរ។

ឯកឧត្តម សួស ប្រាថ្នា បានបញ្ជាក់ថា ផ្អែកលើមូលដ្ឋាននេះហើយ បានជាអគ្គនាយកដ្ឋានរដ្ឋបាលធ្វើការសហការជាមួយលេខាធិការដ្ឋានគ.ជ.អ.ប. ដោយមានការគាំទ្រពីអង្គការតម្លាភាពកម្ពុជា បានដំណើរការកែសម្រួលសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ ព្រមទាំងលិខិតបទដ្ឋានគតិយុត្តពាក់ព័ន្ធ ចុះប្រមូលធាតុចូលពីអ្នកមានភារកិច្ចគាំទ្រ និងអ្នកអនុវត្តផ្ទាល់ នៅរដ្ឋបាលខេត្តកំពត ខេត្តស្វាយរៀង ខេត្តមណ្ឌលគិរី និងខេត្តសៀមរាប ថែមទាំងបានរៀបចំសិក្ខាសាលាពិគ្រោះយោបល់ជាមួយក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ កាលពីខែវិច្ឆិកា ឆ្នាំ២០២៤កន្លងទៅ។

ឆ្លៀតក្នុងឱកាសនោះដែរ ឯកឧត្តមអគ្គនាយកបានកោតសរសើរនិងវាយតម្លៃខ្ពស់ដល់ក្រុមការងាររបស់អគ្គនាយកដ្ឋានរដ្ឋបាល និងលេខាធិការដ្ឋាន គ.ជ.អ.ប. ដែលបានសហការគ្នាយ៉ាងជិតស្និទ្ធជាមួយលោកទីប្រឹក្សា ដោយមានគាំទ្រពីអង្គការតម្លាភាពកម្ពុជា នៅក្នុងដំណើរការរៀបចំកែសម្រួលសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ធ្វើឱ្យមានវឌ្ឍនភាពគួរឱ្យកត់សម្គាល់៕