ជម្លោះពាណិជ្ជកម្មរវាងសហរដ្ឋអាមេរិក និងចិនបានឡើងកម្ដៅជាថ្មីម្ដងទៀត ខណៈដែល លោក ត្រាំ បានប្រកាសគំរាមដាក់ការគ្រប់គ្រងការនាំចេញទៅលើគ្រឿងបន្លាស់យន្តហោះ Boeing

បរទេស៖ ជម្លោះពាណិជ្ជកម្មរវាងសហរដ្ឋអាមេរិក និងចិនបានឡើងកម្ដៅជាថ្មីម្ដងទៀត ខណៈដែលប្រធានាធិបតីអាមេរិក លោក ដូណាល់ ត្រាំ បានប្រកាសគំរាមដាក់ការគ្រប់គ្រងការនាំចេញទៅលើគ្រឿងបន្លាស់យន្តហោះ Boeing។ សេចក្តីថ្លែងការណ៍នេះធ្វើឡើងនៅព្រឹកថ្ងៃសៅរិ៍ចុងសប្តាហ៍នេះ ជាការឆ្លើយតបទៅនឹងការសម្រេចរបស់រដ្ឋាភិបាលចិនដែលបានរឹតបន្តឹងលើការនាំចេញ ធាតុរ៉ែដ៏កម្រ (Rare Earth Minerals) ដែលជាវត្ថុធាតុសំខាន់ក្នុងបច្ចេកវិទ្យាជាន់ខ្ពស់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១១ ខែតុលា ឆ្នាំ២០២៥។

លោក ត្រាំ បានបញ្ជាក់យ៉ាងច្បាស់នៅឯសេតវិមានថា យន្តហោះគឺជា «រឿងធំ» ដែលលោកអាចប្រើជាកម្លាំងសម្ពាធលើទីក្រុងប៉េកាំងបាន។ លោកបានលើកឡើងថា៖ «ពួកគេ (ចិន) មានយន្តហោះ Boeing ជាច្រើន ហើយពួកគេត្រូវការគ្រឿងបន្លាស់ និងវត្ថុជាច្រើនដូចនោះ»។ តាមការអះអាងរបស់ក្រុមហ៊ុនវិភាគអាកាសចរណ៍ Cirium បច្ចុប្បន្ន ក្រុមហ៊ុនអាកាសចរណ៍ចិនមានយន្តហោះ Boeing សរុបដល់ទៅ ១,៨៥៥ គ្រឿង កំពុងប្រើប្រាស់ក្នុងសេវាកម្ម ដែលភាគច្រើនជាប្រភេទ 737 ដែលចាំបាច់ត្រូវមានគ្រឿងបន្លាស់សម្រាប់ថែទាំជាប្រចាំ។ ក្រៅពីនេះ ចិននៅមានការបញ្ជាទិញយន្តហោះថ្មីយ៉ាងតិច ២២២ គ្រឿង ទៀត។

ទោះជាយ៉ាងណា អ្នកវិភាគមើលឃើញថា ទោះបីជាការរឹតបន្តឹងនេះអាចប៉ះពាល់ដល់កេរ្តិ៍ឈ្មោះក្រុមហ៊ុន Boeing ក៏ដោយ ផលប៉ះពាល់ហិរញ្ញវត្ថុដោយផ្ទាល់អាចនឹងតូចតាច ព្រោះបច្ចុប្បន្នការបញ្ជាទិញថ្មីពីចិនមានតិចជាង ៥% នៃការបញ្ជាទិញសរុបរបស់ក្រុមហ៊ុន។ ផ្ទុយទៅវិញ ការហាមឃាត់ការនាំចេញនេះនឹងបង្កផលលំបាកយ៉ាងធ្ងន់ធ្ងរដល់ក្រុមហ៊ុនអាកាសចរណ៍ចិនផ្ទាល់ និងក្រុមហ៊ុនផលិតម៉ាស៊ីនរួមគ្នាដូចជា CFM International ដែលផ្គត់ផ្គង់ម៉ាស៊ីនសម្រាប់យន្តហោះ 737 MAX។

លើសពីនេះ វិធានការរបស់អាមេរិកក៏បានជះឥទ្ធិពលដល់កិច្ចប្រឹងប្រែងរបស់ចិនក្នុងការអភិវឌ្ឍយន្តហោះពាណិជ្ជកម្មក្នុងស្រុក COMAC C919 ផងដែរ ដោយសារយន្តហោះនេះត្រូវការគ្រឿងបន្លាស់ផ្គត់ផ្គង់ពីលោកខាងលិច។ ដូច្នេះ ការគំរាមប្រើ «កាតយន្តហោះ» នេះ គឺជាសញ្ញាថ្មីមួយដែលបង្ហាញថា ភាពតានតឹងរវាងមហាអំណាចសេដ្ឋកិច្ចទាំងពីរនៅតែបន្តរីកធំ ហើយវិស័យអាកាសចរណ៍បានក្លាយជាសមរភូមិថ្មីមួយទៀតនៃសង្គ្រាមពាណិជ្ជកម្មនេះ៕