លោកជំទាវ ជា សិរី អំពាវនាវសហគមន៍អន្តរជាតិរៀបចំប្រព័ន្ធហិរញ្ញវត្ថុដែលមានប្រសិទ្ធភាព រហ័ស ត្រឹមត្រូវ និងមានភាពធន់គ្រប់គ្រាន់
ភ្នំពេញ៖ លោកជំទាវ ជា សិរី ទេសាភិបាលធនាគារជាតិនៃកម្ពុជា អំពាវនាវសហគមន៍អន្តរជាតិរៀបចំប្រព័ន្ធហិរញ្ញវត្ថុដែលមានប្រសិទ្ធភាព រហ័ស ត្រឹមត្រូវ និងមានភាពធន់គ្រប់គ្រាន់ ដើម្បីលើកកម្ពស់វិបុលភាពសម្រាប់ទាំងអស់គ្នា។
ក្នុងឱកាសអញ្ជើញចូលរួមជាវាគ្មិនគន្លឹះក្នុងកិច្ចពិភាក្សាលើប្រធានបទ «ការផ្សារភ្ជាប់បច្ចេកវិទ្យាហិរញ្ញវត្ថុ ទំនុកចិត្ត និងបទប្បញ្ញត្តិ» នៅថ្ងៃទី២៥ ខែកញ្ញា ឆ្នាំ២០២៥ នៅទីស្នាក់ការកណ្តាលនៃធនាគារអភិវឌ្ឍន៍អាស៊ី នៅរដ្ឋធានីម៉ានីល ប្រទេសហ្វីលីពីន លោកជំទាវគូសបញ្ជាក់ពីក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដល់អង្គវេទិកា។ គោលនយោបាយនេះ កំណត់យកបរិយាបន្នកម្ម ជាស្នូលនៃបរិវត្តកម្មឌីជីថលនៃប្រទេសកម្ពុជា មិនមែនជាលទ្ធផល ប៉ុន្តែជាគោលការណ៍នៃការរៀបចំ។ បរិយាបន្នកម្មមិនមែនជាគោលបំណងផ្នែកសប្បុរសធម៌ ប៉ុន្តែជាភាពចាំបាច់ផ្នែកយុទ្ធសាស្ត្រ។
លោកជំទាវលើកទ្បើងទៀតថា បច្ចេកវិទ្យាក្នុងវិស័យហិរញ្ញវត្ថុត្រូវបានវាយតម្លៃតាមភាពចាំបាច់ ពោលគឺបច្ចេកវិទ្យាត្រូវបំពេញតម្រូវការជាក់ស្តែង កសាងទំនុកចិត្ត និងផ្តល់អត្ថប្រយោជន៍ដល់ប្រជាជន៕
