ក្រសួងទេសចរណ៍ រៀបចំសិក្ខាសាលាពង្រឹងសមត្ថភាពគ្រូបង្គោលអាស៊ាន ស្ដីពីវិធានការសុវត្ថិភាព និងអនាម័យក្នុងវិស័យទេសចរណ៍

ភ្នំពេញ៖ ក្រសួងទេសចរណ៍ បានសហការជាមួយរដ្ឋបាលខេត្តសៀមរាប រៀបចំសិក្ខាសាលាពង្រឹងសមត្ថភាពគ្រូបង្គោលអាស៊ាន ស្ដីពីវិធានសុវត្ថិភាព និងអនាម័យ សម្រាប់ប្រតិបត្តិករ និងសហគមន៍នៅក្នុងឧស្សាហកម្មទេសចរណ៍ ដែលសិក្ខាសាលានេះត្រូវបានធ្វើឡើងនៅខេត្តសៀមរាប នាថ្ងៃទី១៦ ខែកញ្ញា ឆ្នាំ២០២៥ ក្រោមអធិបតីភាព ឯកឧត្តម ថុក សុខុម រដ្ឋលេខាធិការក្រសួងទេសចរណ៍ និង លោក ង៉ូវ សេងកាក់ អភិបាលរងខេត្តតំណាងឯកឧត្តម​ ប្រាក់​ សោភ័ណ​ អភិបាលនៃគណៈអិបាលខេត្ត។

លោក ង៉ូវ សេងកាក់ បានលើកឡើងថា គោលបំណងចម្បងនៃសិក្ខាសាលានេះ គឺដើម្បីបង្កើនការយល់ដឹងជាសាធារណៈអំពីគោលការណ៍ណែនាំសុវត្ថិភាព និងអនាម័យរបស់អាស៊ាន ដើម្បីលើកកម្ពស់ទំនុកចិត្តទេសចរ។

លោកបន្តថា គំនិតផ្ដួចផ្ដើមនេះនឹងរួមចំណែកដល់ការអភិវឌ្ឍវិស័យទេសចរណ៍កម្ពុជាឱ្យកាន់តែរីកចម្រើន។ សិក្ខាសាលានេះមានសារៈសំខាន់ណាស់ ព្រោះវានឹងផ្ដល់ចំណេះដឹងសំខាន់ៗដល់គ្រូបណ្ដុះបណ្ដាល ទាំងលើសុវត្ថិភាពចំណីអាហារ និងស្ដង់ដារអនាម័យក្នុងវិស័យទេសចរណ៍ទូទាំងអាស៊ីអាគ្នេយ៍។

លោកបន្ថែមថា សិក្ខាសាលានេះក៏ជួយផ្ដល់ការណែនាំជាក់ស្ដែងដល់ប្រតិបត្តិករ និងសហគមន៍ ដើម្បីការពារខ្លួនឯង ភ្ញៀវទេសចរ និងអ្នកពាក់ព័ន្ធដទៃទៀតពីជំងឺឆ្លងផ្សេងៗផងដែរ។ តាមរយៈការអនុវត្តវិធានការណ៍ទាំងនេះ ប្រទេសជាសមាជិកអាស៊ានអាចបង្ហាញពីការត្រៀមខ្លួន និងសមត្ថភាពរបស់ខ្លួនក្នុងការទទួលភ្ញៀវទេសចរប្រកបដោយសុវត្ថិភាព។

ឯកឧត្តម ថុក សុខុម បានថ្លែងថា ការបណ្ដុះបណ្ដាលដល់គ្រូបង្គោលមកពីបណ្ដាប្រទេសអាស៊ាន គឺដើម្បីឱ្យពួកគាត់អាចបន្តផ្សព្វផ្សាយចំណេះដឹងទាំងនេះដល់ប្រតិបត្តិករទេសចរណ៍នៅតាមបណ្ដាប្រទេសរៀងៗខ្លួន។ ការធ្វើបែបនេះនឹងជួយឱ្យអាជីវកម្មទេសចរណ៍កាន់តែមានលទ្ធភាពប្រកួតប្រជែង និងនិរន្តរភាព ដែលរួមចំណែកដល់ការស្ដារអាជីវកម្មឡើងវិញ និងត្រៀមខ្លួនសម្រាប់បញ្ហាប្រឈមនាពេលអនាគត។

ឯកឧត្តម ក៏បានជំរុញ និងលើកទឹកចិត្តឱ្យប្រតិបត្តិករ និងសហគមន៍ទាំងអស់ យកចិត្តទុកដាក់ខ្ពស់ចំពោះវិធានសុវត្ថិភាព និងអនាម័យ ដើម្បីកសាងទំនុកចិត្តឡើងវិញសម្រាប់ភ្ញៀវទេសចរ។

លើសពីនេះ ឯកឧត្តមក៏បានគូសបញ្ជាក់ពីតួនាទីសំខាន់របស់សហគមន៍មូលដ្ឋានក្នុងការអនុវត្ត និងថែរក្សាស្តង់ដារសុវត្ថិភាព និងអនាម័យ ក្នុងគោលបំណងធានាបាននូវសុវត្ថិភាពសម្រាប់ទាំងភ្ញៀវទេសចរ និងប្រជាជនក្នុងតំបន់ ព្រមទាំងដើម្បីឱ្យការអភិវឌ្ឍទេសចរណ៍មានភាពនិរន្តរភាព និងការទទួលខុសត្រូវខ្ពស់ផងដែរ៕