ក្រសួងមហាផ្ទៃ កោតសសើរដល់អាជ្ញាធរខេត្តតាកែវ បានខិតខំគៀងគរអ្នកវិនិយោគ ដើម្បីបង្កើតឱកាសការងារជូនប្រជាពលរដ្ឋ

តាកែវ៖ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានសម្ដែងការកោតសើរ និងវាយតម្លៃខ្ពស់ដល់អាជ្ញាធរខេត្តតាកែវ បានខិតខំប្រឹងប្រែងគៀងគរបណ្ដាអ្នកវិនិយោគគិន ក្នុងនិងក្រៅប្រទេសមកបណ្ដាក់ទុកក្នុងខេត្តកាន់តែច្រើន ដើម្បីបង្កើនសេដ្ឋកិច្ច និងផ្ដល់ឱកាសការងារដល់ប្រជាពលរដ្ឋ។

ឯកឧត្តម ប៊ុន ហុន បានថ្លែងបែបនេះក្នុងឱកាសអញ្ជើញជាអធិបតីក្នុងពិធីប្រកាសចូលកាន់មុខតំណែង អភិបាលរងខេត្តតាកែវថ្មី នៅសាលប្រជុំរដ្ឋបាលខេត្ត នាថ្ងៃសុក្រ ទី១២ ខែកញ្ញា ឆ្នាំ២០២៥ ពិធីនេះ ក៏មានការចូលរួមពីឯកឧត្តម វ៉ី សំណាង អភិបាលខេត្ត ថ្នាក់ដឹកនាំក្រសួងមហាផ្ទៃ ក្រុមប្រឹក្សាខេត្ត កងកម្លាំងទាំង៣ មន្ទីរអង្គភាពជុំវិញខេត្ត អាជ្ញាធរក្រុង-ស្រុក ឃុំ-សង្កាត់ និងមន្រ្តីពាក់ព័ន្ធជាច្រើនរូបទៀត។

ឯកឧត្តម រដ្ឋលេខាធិការក្រសួងមហាផ្ទៃ បានថ្លែងថា ផ្អែកតាមរបាយការណ៍ របស់ ឯកឧត្តម អភិបាលខេត្តតាកែវ ថា គិតមកដល់ពេលនេះមានអ្នកវិនិយោគិនបរទេសជាច្រើនបានមកវិនិយោគបើករោងចក្រ សហគ្រាសនៅក្នុងខេត្តតាកែវ ដែលបច្ចុប្បន្នកំពុងមានតម្រូវការពលកម្មជាង ៦ពាន់កន្លែងសម្រាប់ផ្ដល់ឱកាសការងារដល់ពលរដ្ឋ ជួយជីវភាពគ្រួសារកាន់តែប្រសើរថែមទៀត។ សមិទ្ធផលទាំងអស់វាកើតឡើងពីកិច្ចខិតខំប្រឹងប្រែងរបស់រាជរដ្ឋាភិបាល ពិសេសអាជ្ញាធរខេត្តតាកែវ រួមនឹងមន្រ្តីពាក់ព័ន្ធទាំងអស់ ក្នុងន័យសំដៅធ្វើយ៉ាងណាបង្កើនសេដ្ឋកិច្ចក្នុងខេត្តបានរីកចម្រើន កាត់បន្ថយភាពក្រីក្រ និងការចំណាកស្រុករបស់បងប្អូនប្រជាពលរដ្ឋ។

ក្នុងឱកាសនោះដែរឯកឧត្តម ប៊ុន ហុន ក៏បានជំរុញដល់អាជ្ញាធរខេត្ត រួមនឹងសមត្ថកិច្ចពាក់ព័ន្ធទាំងអស់ត្រូវបន្តយកចិត្តទុកដាក់ពង្រឹងគោលនយោបាយភូមិឃុំ-សង្កាត់មានសុវត្ថិភាពឲ្យបានល្អប្រសើរ ពិសេសត្រូវបង្កើនការបង្ក្រាបបទល្មើសផ្សេងៗរួមមាន៖ចោរលួចឆក់ប្លន់ បញ្ហាគ្រឿងញៀន ក្មេងទំនើង និងល្បែងស៊ីសងគ្រប់ប្រភេទឱ្យអស់ពីក្នុងមូលដ្ឋានរបស់ខ្លួន ដើម្បីធានាបាននូវសន្ដិសុខសណ្ដាប់ធ្នាប់សង្គម និងសុខសុវត្ថិភាពជូនដល់បងប្អូនប្រជាពលរដ្ឋផងដែរ។

ឯកឧត្តម រដ្ឋលេខាធិការ បានបន្តថា រដ្ឋបាលខេត្ត ត្រូវខិតខំធ្វើការបណ្តុះបណ្តាលកសាងសមត្ថភាពដល់មន្ត្រីរាជការគ្រប់លំដាប់ថ្នាក់ និងជំរុញលើកទឹកចិត្តមន្ត្រីឱ្យចូលរួមក្នុងការអភិវឌ្ឍសមត្ថភាព ជាពិសេសសមត្ថភាព ជំនាញព័ត៌មានវិទ្យា និងឌីជីថល ដើម្បីឈោងចាប់យកបច្ចេកវិទ្យាទំនើបៗ ក្នុងការអនុវត្តការងារឱ្យ កាន់តែឆាប់រហ័ស និងមានប្រសិទ្ធភាពខ្ពស់៕