កម្ពុជាបន្តអំពាវនាវយ៉ាងទទូចឲ្យថៃដោះលែងទាហានកម្ពុជា១៨នាក់ ដែលថៃចាប់ទៅនោះ មកកម្ពុជាវិញឲ្យបានឆាប់
ភ្នំពេញ៖ លោកជំទាវ ម៉ាលី សុជាតា អ្នកនាំពាក្យក្រសួងការពារជាតិ បានលើកឡើងថា កម្ពុជា និងសហគមន៍អន្តរជាតិ នៅតែបន្តអំពាវនាវយ៉ាងទទូចឲ្យថៃធ្វើការដោះលែងទាហានកម្ពុជា១៨នាក់ ដែលថៃចាប់ទៅនោះ មកកម្ពុជាវិញឲ្យបានឆាប់ ខណៈក្រុមគ្រួសាររបស់ជនរងគ្រោះកំពុងទទឹងរងចាំទាំងយប់ទាំងថ្ងៃ ដោយគិតមកដល់ថ្ងៃនេះ គឺមានរយៈពេល២៧ថ្ងៃហើយបន្ទាប់ពីទាហានថៃចាប់ពួកគេដោយខុសច្បាប់ កាលពីព្រឹកថ្ងៃទី២៩ ខែកក្កដា ឆ្នាំ២០២៥ កន្លងទៅនោះ។
ថ្លែងក្នុងសន្និសីទសារព័ត៌មាននៅព្រឹកថ្ងៃទី២៥ ខែសីហានេះលោកជំទាវ ម៉ាលី សុជាតា បានឲ្យដឹងថា សភាពការណ៍ជួរមុខគិតចាប់តាំងពីម៉ោង១២រំលងអធ្រាតថ្ងៃទី២៥ខែសីហាឆ្នាំ២០២៥នេះ សភាពការណ៍នៅតាមបន្ទាត់ព្រំដែនខេត្តព្រះវិហារ , ខេត្តឧត្តមានជ័យ និងខេត្តបន្ទាយមានជ័យ មានសភាពស្ងប់ស្ងាត់និងស្ថិតនៅក្រោមការគ្រប់គ្រងរបស់កងកម្លាំងរបស់យើងជាមួយនឹងស្មារតីក្រុងប្រយ័ត្នខ្ពស់ជានិច្ច ក្នុងការបំពេញតួនាទីរបស់ខ្លួនយ៉ាងខ្ជាប់ខ្ជួនបំផុត ដើម្បីការពារអធិបតេយ្យ និងបូរណភាពទឹកដីរបស់កម្ពុជា។
លោកជំទាវអ្នកនាំពាក្យសួងការការពារជាតិ បន្តថា នៅព្រឹកនេះមេភូមិភាគ៥ កម្ពុជានឹងបើកកិច្ចប្រជុំជាមួយបញ្ជាការដ្ឋានការពារព្រំដែនខេត្តត្រាត និងចន្ថាបូរី ថៃ ដោយកិច្ចប្រជុំនេះ នឹងធ្វើឡើងនៅខេត្តប៉ៃលិន៕
