វាសូវី៖ បើតាមការចេញផ្សាយដោយ ទីភ្នាក់ងារព័ត៌មាន AFP រដ្ឋមន្រ្តីការពារជាតិប៉ូឡូញ កាលពីថ្ងៃព្រហស្បតិ៍សប្តាហ៍នេះ បានឱ្យដឹងថា ប្រទេសហូឡង់នឹងបញ្ជូនប្រព័ន្ធមីស៉ីលការពារដែនអាកាស Patriot ចំនួន២គ្រឿង មកកាន់ប៉ូឡូញ។
គ្រោងបញ្ជូនប្រព័ន្ធ Patriot ខាងលើ គឺបន្ទាប់ពីក្នុងសប្តាហ៍នេះ យន្តហោះដ្រូន១គ្រឿងផលិតដោយរុស្ស៉ី បានធ្លាក់ទៅលើទីវាលមួយ នៅភាគខាងកើតប្រទេសប៉ូឡូញ ដែលបង្កើនការព្រួយបារម្ភថែមទៀតនៅប៉ូឡូញ អំពីការរំលោភដែនអាកាសរបស់ខ្លួន អំឡុងសង្រ្គាម នៅអ៊ុយក្រែន ដែលស្ថិតជាប់គ្នា។
រដ្ឋមន្រ្តីការពារជាតិប៉ូឡូញ លោក Wladyslaw Kosiniak-Kamysz បាននិយាយថា ដោយសារតែស្ថានការណ៍ជម្លោះ ដែលកំពុងបន្តនៅអ៊ុយក្រែន និងតួនាទីរបស់ប៉ូឡូញ ក្នុងការបម្រើជាមជ្ឈមណ្ឌលផ្ទេរជំនួយយោធាឱ្យទៅអ៊ុយក្រែន ហូឡង់បានសម្រេចចិត្តផ្តល់ការគាំទ្រប្រព័ន្ធខាងលើ ដើម្បីជួយធានាការពារដែនអាកាសរបស់ប្រទេសប៉ូឡូញ។
គួរបញ្ជាក់ថា បើតាមហូឡង់ ប្រព័ន្ធមីស៉ីល Patriot ទាំង២គ្រឿងនោះ នឹងត្រូវដាក់ពង្រាយនៅប៉ូឡូញ ចាប់ពីថ្ងៃទី១ ខែធ្នូ ឆ្នាំ២០២៥ ដល់ថ្ងៃទី១ ខែមិថុនា ឆ្នាំ២០២៦៕
