អ៉ីស្រាអែលនឹងចាប់ផ្ដើមកិច្ចចរចាឡើងវិញភ្លាមៗស្ដីពី ការដោះលែងចំណាប់ខ្មាំងដែលកំពុងជាប់ឃុំនៅក្នុងតំបន់ហ្កាហ្សា និងការបិទបញ្ចប់សង្រ្គាមជាមួយហាម៉ាសប៉ុន្តែត្រូវផ្អែកលើលក្ខខណ្ឌដែលអ៉ីស្រាអែលទទួលយកបាន

ហ្ស៊េរុយសាឡិម៖ បើតាមការចេញផ្សាយដោយទីភ្នាក់ងារសារព័ត៌មាន Reuters លោក Benjamin Netanyahu នាយករដ្ឋមន្ត្រីអ៉ីស្រាអែល បាននិយាយនៅថ្ងៃព្រហស្បតិ៍ ទី២១ ខែសីហាថាអ៉ីស្រាអែលនឹងចាប់ផ្ដើមកិច្ចចរចាឡើងវិញភ្លាមៗស្ដីពី ការដោះលែងចំណាប់ខ្មាំងដែលកំពុងជាប់ឃុំនៅក្នុងតំបន់ហ្កាហ្សា និងការបិទបញ្ចប់សង្រ្គាមជាមួយហាម៉ាសជិត២ឆ្នាំមកនេះ ប៉ុន្តែត្រូវផ្អែកលើលក្ខខណ្ឌដែលអ៉ីស្រាអែលទទួលយកបាន។

នេះគឺជាការឆ្លើយតបលើកដំបូងរបស់លោក Netanyahu ទៅនឹងសំណើបទឈប់បាញ់បណ្ដោះអាសន្នមួយស្នើឡើងដោយអេហ្ស៉ីប និងកាតា ដែលក្រុមហាម៉ាសបានយល់ព្រមទទួលយក កាលពីថ្ងៃចន្ទដើមសប្ដាហ៍កន្លងទៅនេះ។

ថ្លែងទៅកាន់កងទ័ពនៅក្បែរព្រំដែនអ៉ីស្រាអែលជាមួយតំបន់ហ្កាហ្សា លោក Netanyahu បានលើកឡើងថាលោកនៅតែគាំទ្រដល់ផែនការដែល ត្រូវបានអនុម័តដើម្បីបំបាក់ក្រុមហាម៉ាស និងកាន់កាប់ទីក្រុងហ្កាហ្សា។ ប៉ុន្តែព្រមពេលជាមួយគ្នា នាយករដ្ឋមន្ត្រីអ៉ីស្រាអែលរូបនេះបានអះអាងថារូបលោកបានណែនាំឱ្យក្រុមមន្ត្រីរបស់លោក ចាប់ផ្ដើមកិច្ចចរចាឡើងវិញភ្លាមៗស្ដីពីការដោះលែងចំណាប់ខ្មាំង និងការបិទបញ្ចប់សង្រ្គាមផ្អែកលើលក្ខខណ្ឌដែលអ៉ីស្រាអែលអាចទទួលយកបាន។

គួរបញ្ជាក់ថា មន្ត្រីអ៉ីស្រាអែលម្នាក់ ក៏បាននិយាយដែរថាអ៉ីស្រាអែលនឹងបញ្ជូនក្រុមអ្នកចរចាទៅចូលរួមកិច្ចចរចា នៅពេលទីតាំងរៀបចំកិច្ចចរចាត្រូវបានកំណត់៕