កងទ័ពជើងទឹកអ៉ីរ៉ង់ បើកសមយុទ្ធបាញ់មីស៊ីលទ្រង់ទ្រាយធំរយៈពេលពីរថ្ងៃ ដើម្បីបង្ហាញសាច់ដុំ

តេអេរ៉ង់៖ បើយោងតាមការចេញផ្សាយដោយ ទីភ្នាក់ងារសារព័ត៌មាន Xinhua នៅថ្ងៃទី២១ ខែសីហា កងទ័ពជើងទឹកអ៉ីរ៉ង់ បានបើកសមយុទ្ធបាញ់មីស៊ីលទ្រង់ទ្រាយធំរយៈពេលពីរថ្ងៃ ដោយចាប់ផ្តើមនៅថ្ងៃព្រហស្បតិ៍នេះ ក្រោមប្រធានបទ «ថាមពលប្រកបដោយនិរន្តរភាព ១៤០៤» (Sustainable Power 1404) នៅឈូងសមុទ្រអូម៉ង់ និងភាគខាងជើងមហាសមុទ្រឥណ្ឌា ដើម្បីបង្ហាញសាច់ដុំឡើងវិញ ក្រោយរងការខាតបង់យ៉ាងធ្ងន់ធ្ងរក្នុងសង្គ្រាមជាមួយអ៉ីស្រាអែល។

នៅក្នុងសេចក្តីថ្លែងការណ៍របស់កងទ័ពអ៉ីរ៉ង់បានឱ្យដឹងថា កងកម្លាំងចម្រុះរួមមាន នាវាលើផ្ទៃទឹក នាវាមុជទឹក អង្គភាពផ្លូវអាកាស និងអង្គភាពសង្គ្រាមអេឡិចត្រូនិក បានចូលរួមក្នុងសមយុទ្ធនេះ។ នៅថ្ងៃដំបូង មីស៊ីល Cruise ជាច្រើនគ្រាប់ដែលផលិតក្នុងស្រុក ត្រូវបានបាញ់ចេញពីនាវាចម្បាំង និងពីឆ្នេរសមុទ្រក្នុងពេលដំណាលគ្នា ដោយបានវាយប្រហារបំផ្លាញគោលដៅដោយជោគជ័យ។ លើសពីនេះ ដ្រូនអត្តឃាតប្រភេទ Bavar 5 ក៏បានបំពេញបេសកកម្មវាយប្រហារគោលដៅមួយដោយជោគជ័យផងដែរ។

អ្នកនាំពាក្យកងទ័ពជើងទឹក លោក Abbas Hassani បានបញ្ជាក់ថា សមយុទ្ធនេះគឺដើម្បីពង្រឹងសមត្ថភាពប្រយុទ្ធរបស់កងកម្លាំងអ៉ីរ៉ង់ និងដើម្បីបង្ហាញពីកម្លាំងរារាំងរបស់ខ្លួន ដែលពឹងផ្អែកទាំងស្រុងលើបច្ចេកវិទ្យាដែលផលិតក្នុងស្រុក។

គួរបញ្ជាក់ថា នេះគឺជាសមយុទ្ធទ្រង់ទ្រាយធំលើកដំបូងរបស់អ៉ីរ៉ង់ ចាប់តាំងពីបញ្ចប់សង្គ្រាមផ្លូវអាកាសរយៈពេល ១២ថ្ងៃជាមួយអ៉ីស្រាអែលកាលពីខែមិថុនា។ ជម្លោះនោះបានផ្ទុះឡើងក្រោយការវាយប្រហាររបស់អ៉ីស្រាអែល និងសហរដ្ឋអាមេរិកទៅលើទីតាំងនុយក្លេអ៊ែររបស់អ៉ីរ៉ង់ ដែលជំរុញឱ្យអ៉ីរ៉ង់វាយប្រហារតបតវិញទៅលើអ៉ីស្រាអែល និងមូលដ្ឋានទ័ពអាមេរិកនៅកាតា មុនពេលបទឈប់បាញ់មួយត្រូវបានសម្រេចនៅថ្ងៃទី២៤ ខែមិថុនា៕