ឯកឧត្តម ខាន់ ម៉ាណេរ និង ឯកឧត្តម ច័ន្ទ សុផល ដឹកនាំក្រុមក្រឡាហោមមនុស្សធម៌ នាំយកគ្រឿងឧបភោគបរិភោគរបស់សម្តេច និងលោកជំទាវ និងសម្ភារៈប្រើប្រាស់ចាំបាច់មួយចំនួន ដើម្បីផ្ញើជូនវីរកងទ័ពជួរមុខឈរជើងនៅតាមព្រំដែនទិសខេត្តបាត់ដំបងចំនួន ៧ អង្គភាព
ភ្នំពេញ៖ថ្ងៃសៅរ៍ ៧រោច ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៦ ខែសីហា ឆ្នាំ២០២៥ ដោយមានការណែនាំដ៏ខ្ពង់ខ្ពស់ពីសម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ អ្នកតំណាងរាស្រ្តមណ្ឌលបាត់ដំបង និងលោកជំទាវ ញ៉ែម សាខន សខេង ប្រធានកិត្តិយសក្រុមអ្នកម្តាយមនុស្សធម៌ ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន និង ឯកឧត្តម ច័ន្ទ សុផល បានដឹកនាំក្រុមក្រឡាហោមមនុស្សធម៌ ដោយសហការជាមួយក្រុមអ្នកម្តាយមនុស្សធម៌បាត់ដំបង នាំយកគ្រឿងឧបភោគបរិភោគរបស់សម្តេច និងលោកជំទាវ មានដូចជា អង្ករ មី អំបុកលីងលាយសាច់ជ្រូកបង្គារ ទឹកសុទ្ធ ទឹកស៊ីអ៊ីវទឹកត្រី ពងទា បន្លែ អាហារក្រៀម អាវភ្លៀង អង្រឹងមុង និងសម្ភារៈប្រើប្រាស់ចាំបាច់មួយចំនួនទៀត ដើម្បីផ្ញើជូនវីរកងទ័ពជួរមុខឈរជើងនៅតាមព្រំដែនទិសខេត្តបាត់ដំបងចំនួន ៧ អង្គភាព។
ឯកឧត្តម ខាន់ ម៉ាណេរ បានពាំនាំនូវប្រសាសន៍របស់សម្តេចក្រឡាហោម ស ខេង និងលោកជំទាវ ញ៉ែម សាខន សខេង សាកសួរសុខទុក្ខកងកម្លាំងទាំងអស់ដែលឈរជើងនៅតាមបន្ទាត់ព្រំដែនខេត្តបាត់ដំបង ព្រមទាំងកោតសរសើរចំពោះពលិកម្មរបស់វិរយុទ្ធជនក្នុងការការពារបូរណភាពទឹកដី។ សម្តេចក្រឡាហោម និងលោកជំទាវ សូមឱ្យវិរយុទ្ធជនយើងខិតខំថែរក្សាសុខភាព និងជូនពរឱ្យមានសុខសុវត្តិភាព និងជ័យជំនះជានិច្ច៕
