រដ្ឋមន្ត្រីក្រសួងរតនាគារអាម៉េរិក ព្រមានថា រដ្ឋធានីវ៉ាស៊ីនតោនអាចដំឡើងពន្ធបន្ទាប់បន្សំលើប្រទេសឥណ្ឌា
វ៉ាស៊ីនតោន៖ លោក ស្កុត បេសសិន រដ្ឋមន្ត្រីក្រសួងរតនាគារអាម៉េរិកបានព្រមានថា រដ្ឋធានីវ៉ាស៊ីនតោនអាចដំឡើងពន្ធបន្ទាប់បន្សំលើប្រទេសឥណ្ឌា ដោយផ្អែកលើលទ្ធផលនៃកិច្ចប្រជុំរបស់ប្រធានាធិបតី ដូណាល់ ត្រាំ ជាមួយសមភាគីរុស្ស៊ី លោក វ្ល៉ាឌីមៀ ពូទីន នៅរដ្ឋអាឡាស្កា។
លោក ត្រាំ បានដាក់ពន្ធ២៥ភាគរយលើឥណ្ឌា និងពន្ធ២៥ភាគរយសម្រាប់ការទិញប្រេង និងអាវុធពីរុស្ស៊ីកាលពីដើមខែនេះ។ សហរដ្ឋអាម៉េរិក កំពុងព្យាយាមសម្រុះសម្រួលបទឈប់បាញ់រវាងរុស្ស៊ី និងអ៊ុយក្រែន ហើយបានព្រមានអំពីផលវិបាកធ្ងន់ធ្ងរ ប្រសិនបើរដ្ឋធានីម៉ូស្គូមិនយល់ព្រមលើកិច្ចព្រមព្រៀងសន្តិភាព។
លោក ត្រាំ និងលោក ពូទីន គ្រោងនឹងជួបប្រជុំគ្នានៅទីក្រុង Anchorage នៅថ្ងៃទី១៥ ខែសីហា ដើម្បីពិភាក្សាអំពីការបញ្ចប់សង្រ្គាមនៅអ៊ុយក្រែន។ ការបង្កើនការនាំចូលប្រេងឆៅពីរុស្ស៊ីដែលមានតម្លៃថោករបស់រដ្ឋធានីញូវដេលី បន្ទាប់ពីផ្ទុះសង្រ្គាមអ៊ុយក្រែន បានធ្វើឱ្យទំនាក់ទំនងឥណ្ឌា-អាម៉េរិក កាន់តែតានតឹង និងរំខានដល់កិច្ចចរចាពាណិជ្ជកម្មដែលកំពុងបន្តជាមួយរដ្ឋធានីវ៉ាស៊ីនតោន។
ពន្ធគយរបស់លោក ត្រាំ គឺជាផ្នែកមួយនៃផែនការររដ្ឋបាលរបស់លោក ក្នុងការជំរុញសេដ្ឋកិច្ចសហរដ្ឋអាម៉េរិក និងធ្វើឱ្យពាណិជ្ជកម្មពិភពលោកមានភាពយុត្តិធម៌។ ការចរចាពាណិជ្ជកម្មរវាងរដ្ឋធានីញូវដេលី និងរដ្ឋធានីវ៉ាស៊ីនតោន គ្រោងនឹងបន្តជាមួយអ្នកចរចាអាម៉េរិក ដែលរំពឹងថា នឹងទៅដល់ប្រទេសឥណ្ឌានៅថ្ងៃទី២៥ ខែសីហា។ អត្រាពន្ធ៥០ភាគរយថ្មីរបស់លោក ត្រាំ លើប្រទេសឥណ្ឌា គ្រោងនឹងចូលជាធរមាននៅថ្ងៃទី២៧ ខែសីហា ធ្វើឱ្យឥណ្ឌាក្លាយជាដៃគូពាណិជ្ជកម្មអាម៉េរិកដែលជាប់ពន្ធខ្ពស់បំផុតនៅអាស៊ី និងអាចរារាំងដល់ឧស្សាហកម្មដែលផ្តោតលើការនាំចេញដូចជា វាយនភ័ណ្ឌ និងគ្រឿងអលង្ការជាដើម៕
