អ៉ីស្រាអែលមានបំណងគ្រប់គ្រងតំបន់ហ្កាហ្សាទាំងស្រុង បើទោះជាកំពុងរងការរិះគន់យ៉ាងសម្បើមទាំងនៅក្នុងស្រុក និងអន្តរជាតិ
Reuters៖ បើតាមការចេញផ្សាយដោយទីភ្នាក់ងារសារព័ត៌មាន Reuters នាយករដ្ឋមន្ត្រីអ៉ីស្រាអែល លោក Benjamin Netanyahu បាននិយាយថាអ៉ីស្រាអែលមានបំណងគ្រប់គ្រងតំបន់ហ្កាហ្សាទាំងស្រុង បើទោះជាកំពុងរងការរិះគន់យ៉ាង សម្បើមទាំងនៅក្នុងស្រុក និងអន្តរជាតិ ចំពោះវិនាសកម្មនៃសង្រ្គាមជិត២ឆ្នាំមកនេះនៅក្នុងតំបន់ហ្កាហ្សា ខណៈអ្នកស្លាប់ដោយសារគ្រោះអត់ឃ្លានបន្តកើនឡើងក៏ដោយ។
នៅពេលត្រូវបានអ្នកសារព័ត៌មាន Fox News សាកសួរក្នុងបទសម្ភាសន៍មួយកាលពីថ្ងៃព្រហស្បតិ៍ ទី៧ ខែសីហា ថាតើអ៉ីស្រាអែលនឹងគ្រប់គ្រងតំបន់ហ្កាហ្សាទាំងមូលឬ? លោក Netanyahu បានឆ្លើយថាពិតណាស់ អ៉ីស្រាអែលមានបំណងគ្រប់គ្រងតំបន់ហ្កាហ្សាទាំងមូល តែមិនចង់ដឹកនាំដែនដីប៉ាឡេស្ទីនមួយនេះនោះទេ។ «យើងមានបំណងគ្រប់គ្រង ដើម្បីធានាសន្តិសុខរបស់យើង ដើម្បីកម្ចាត់ហាម៉ាស…ហើយប្រគល់តំបន់នេះទៅឱ្យរដ្ឋបាលស៊ីវិលមួយដែលមិនមែនហាម៉ាស និងមិនមែនមនុស្សដែលមានគំនិតចង់បំផ្លាញ អ៉ីស្រាអែល»។
គួរបញ្ជាក់ថា បើតាមលោក Netanyahu អ៉ីស្រាអែលចង់ប្រគល់តំបន់ហ្កាហ្សាទៅឱ្យកងកម្លាំងអារ៉ាប់ជាអ្នកដឹកនាំ តែលោកមិនបានបញ្ជាក់ថាតើប្រទេសអារ៉ាប់មួយណានោះទេ៕
